ԵՐԵՎԱՆ, 16 հունիսի – Sputnik. Հունիսի 17–ից 24–ը Գիտության և մշակույթի ռուսական կենտրոնի (ԳՄՌԿ) աջակցությամբ Երևանում պատանի և երիտասարդ դաշնակահարների համար կանցկացվի Առնո Բաբաջանյանի անվան IV միջազգային մրցույթ–փառատոնը։
Մրցույթ–փառատոնի կազմակերպիչներն են ՀՀ կրթության և գիտության նախարարությունը և Առնո Բաբաջանյանի անվան պետական երաժշտական մանկավարժական քոլեջը։
«Անցած տարի մրցույթի մասնակցության համար կազմակերպիչները Երևանից, Հայաստանի մարզերից, ԼՂՀ–ից, Ռուսաստանից, Վրաստանից, Սիրիայից, Իրանից, Ֆրանսիայից և Էստոնիայից ստացել են 95 հայտ», –հայտնել է ԳՄՌԿ–ն։
Գիտության և մշակույթի ռուսական կենտրոնը Երևանում հատուկ անվանակարգ է սահմանել ռուս երգահանների ստեղծագործությունների լավագույն կատարման համար։ Հաղթողին հատուկ մրցանակ է սպասվում։
Միջազգային ժյուրիի կազմում են դաշնակահար, Երևանի պետական կոնսերվատորիայի պրոֆեսոր Սերգեյ Սարաջյանը (Հայաստան), Հայաստանի Հանրապետության ժողովրդական արտիստ, դաշնակահարուհի, Հայաստանի պետական նվագախմբի մենակատարուհի Սվետլանա Նավասարդյանը (Հայաստան), Տարտուում Խեյնո Էլլերի անվան երաժշտական ուսումնարանի տնօրեն, Էստոնիայի երաժշտական դպրոցների կառավարման միության ղեկավար Կադրի Լեյվատեգիան (Էստոնիա), միջազգային մրցույթների դափնեկիր, Ա.Ժուբանովի անվան հատուկ միջնակարգ երաժշտական դպրոցի դասախոս Գուլջամիլա Մուհամեջանովան (Ղազախստան), դաշնակահար, Թբիլիսիի Վ. Սարաջիշվիլի անվան պետական կոնսերվատորիայի դասախոս Ալեքսանդր Գարբերը (Վրաստան), դաշնակահարուհի, միջազգային մրցույթների դափնեկիր, Արամ Խաչատրյանի տուն–թանգարանի տնօրեն Արմինե Գրիգորյանը (Հայաստան), երգահան–դաշնակահար, Երևանի Կոմիտասի անվան պետական կոնսերվատորիայի դաշնամուրային ֆակուլտետի վարիչ, պրոֆեսոր Սուրեն Զաքարյանը (Հայաստան), դաշնակահար, Երևանի Կոմիտասի անվան պետական կոնսերվատորիայի պրոռեկտոր Վաղարշակ Հարությունյան (Հայաստան), դաշնակահար, Հայաստանի վաստակավոր արտիստ, միջազգային մրցույթների դափնեկիր Արմեն Բաբախանյան (Հայասատան), դաշնակահար, պրոֆեսոր, Մոսկվայի պետական կոնսերվատորիային կից Ակադեմիկ երաժշտական քոլեջի դասախոս Գայանե Հախնազարյանը (Ռուսաստան)։
Մրցույթ– փառատոնի գլխավոր հովանավորը «Ար–Տուր Բաս» ընկերությունը և «Գնոմոն» Երևանյան ոսկերչական գործարանը, «Շարմ Հոլդինգ» և «Մագնետրոն» ընկերությունները, «Տաշիր» ընկերությունների խումբը։ Տեղեկատվական հովանավորներն են Հայաստանի հանրային հեռուստատեսությունը և Հայաստանի հանրային ռադիոն։
Փառատոնը կանցկացվի Արամ խաչատրյանի տուն–թանգարանի, Երևանի Կոմիտասի անվան պետական կոնսերվատորիայի, Մշակութային կրթության աջակցության հիմնադրամի, Հայաստանի կոմպոզիտորների միության, Առնո Բաբաջանյանի հիշատակի միջազգային հիմնադրամի, Կամերային երաժշտության ազգային կենտրոնի աջակցությամբ։
