ԵՐԵՎԱՆ, 16 հունիսի – Sputnik. Մինչև հունիսի վերջ Հայաստանի քաղաքացի Հրաչյա Հարությունյանը կվերադարձվի Հայաստան։ Այս մասին տեղեկացնում է Ռուսարմինֆոն։ Ըստ աղբյուրի` նախատեսվում է, որ Հրաչյա Հարությունյանի վերադարձը կլինի առաջիկա օրերին, նախնական տվյալներով` հաջորդ շաբաթ։
Ամբողջությամբ կատարվել են ֆինանսական պարտավորությունները, որոնք խոչընդոտում էին արտահանձնմանը: Խոսքը 18 միլիոն ռուսական ռուբլու կամ ավելի քան 153 միլիոն դրամի մասին է։
Ավելի վաղ Հարությունյանի կնոջ հայրը՝ Վիկտոր Մարտիրոսյանը նշել էր, որ Հայաստանի Հանրապետությունը Ռուսաստանին փոխանցել է այն գումարը, որը տուժածները պահանջում էին։
Հիշեցնենք՝ Հրաչյա Հարությունյանն իր «Կամազ» մակնիշի մեքենայով 2013-ի հուլիսի 13-ին ՌԴ Պոդոլսկի շրջանի մերձակայքում բախվել էր մարդատար ավտոբուսին: Վթարի հետևանքով զոհվել էր 18 մարդ։ Նա դատապարտվել է 6 տարի ու 9 ամիս ազատազրկման:
