ԵՐԵՎԱՆ, 16 հունիսի — Sputnik, Լաուրա Սարգսյան. «Խաղաղության հիմնադրամ» կազմակերպության հիմնադիր թբիլիսահայ Գեորգի Թումասյանը մեկ տարի շարունակ Վրաստանի երիտասարդության շահերը կներկայացնի ՄԱԿ–ում։ Գեորգին այդ ընթացքում պատրաստվում է երիտասարդության տարբեր խմբերի խնդիրներին կառուցողական լուծումներ գտնել։
«Ես լուծելու եմ երիտասարդների բոլոր խմբերի խնդիրները։ Ոչ մի խումբ չի առանձնացվի։ Իմ գործունեության ուղղություններից մեկն էթնիկ փոքրամասնությունների ներկայացուցիչների, այդ թվում երիտասարդ հայերի ինտեգրումն է», – Sputnik Արմենիայի թղթակցի հետ զրույցում ասաց Թումասյանը։
Առկա խնդիրները նա պատրաստվում է լուծել ոչ կառավարական և միջազգային կազմակերպությունների, ինչպես նաև երկրի իշխանությունների ներկայացուցիչների ներգրավմամբ։ «ՄԱԿ–ում Վրաստանի երիտասարդության ներկայացուցիչ» դառնալու համար Թումասյանը Սպորտի և երիտասարդության հարցերի և Արտաքին գործերի նախարարությունների կազմակերպած բաց մրցույթի երեք փուլ է անցել։
Մանդատ ստանալու համար մրցույթին կարող էին մասնակցել 18-25 տարեկան բարձր առաջադիմություն ունեցող ակտիվ երիտասարդներ, որոնք տարբեր թեմաներով հրապարակած հոդվածներ են ունեցել։ Փաստաթղթեր ներկայացնելուց, հարցազրույց անցնելուց հետո ընտրված թեկնածուներն անգլերեն ելույթ են ունեցել Սպորտի և երիտասարդության հարցերի նախարարության հանրային միջոցառման ընթացքում։
«Ես ուժերս փորձել եմ նաև անցյալ և նախանցյալ տարի, սակայն երրորդ անգամ արդյունքի հասա։ Անցյալ տարի ես երկրորդ տեղը զբաղեցրի», – ասաց Թումասյանը։
Նրա խոսքով` այս հաղթանակը կարևոր էր իր համար, քանի որ ընդգծում է Վրաստանի ժողովրդավարական զարգացման մակարդակը, չէ՞ որ ՄԱԿ–ում Վրաստանի երիտասարդության շահերն առաջին անգամ է ներկայացնելու ազգային փոքրամասնության ներկայացուցիչը։ «Սա շատ լավ հնարավորություն է ցանկացած երիտասարդի համար, քանի որ ամբողջ երկրի երիտասարդներին ներկայացնելը մեծ պատասխանատվություն է։ Դու պարտավոր ես պատշաճ կերպով ներկայացնել երիտասարդությանը», – ասաց Թումասյանը։
Բացի երիտասարդների հետ աշխատանքից, Թումասյանը պետք է մեկ տարվա ընթացքում մի շարք միջոցառումների մասնակցի, ներառյալ երկրի բոլոր շրջաններով ուղևորություններն ու ՄԱԿ–ի Գլխավոր վեհաժողովի 70-րդ հոբելյանական նստաշրջանի մասնակցությունը։
Թումասյանը սովորում է Թբիլիսիի Ազատ համալսարանի միջազգային հարաբերությունների ֆակուլտետի մագիստրատուրայի երկրորդ կուրսում։ ՄԱԿ–ի Գլխավոր վեհաժողովը 1981 թվականին առաջին անգամ հանդես է եկել երիտասարդ ներկայացուցիչներին անդամ–պետությունների պաշտոնական պատվիրակությունների կազմում ներառելու նախաձեռնությամբ։ Նախագիծը հաջողությամբ իրականացվում է աշխարհի 30 երկրում, այդ թվում և Վրաստանում։ Վրաստանն իր ներկայացուցչին ՄԱԿ է ուղարկում 2012 թվականից։
