ԵՐԵՎԱՆ, 17 հունիսի — Sputnik, Արմենուհի Մխոյան. Անդրադառանալով հունիսի 16 և 17 հակառակորդի իրականացրած գործողություններին՝ Արծրուն Հովհաննիսյանը փաստեց, որ վերջին շրջանում բավական հանգիստ իրավիճակ էր, իսկ կրակոցները քիչ էին, դրանք շատացել են հունիսի 16-ի դրությամբ, ընդ որում, կիրառվել են ոչ հրաձգային զենքեր:
«Դժվար է այդ գործողություններն ինչ-որ բանով պայմանավորել: Հակառակորդը, շատ դեպքերում, ունի իր ներքին հաշվարկներն, այդ թվում՝ նաև հայ հանրության վրա ազդելու: Կրակոցներն ակտիվացել են երեկվա դրությամբ ՝ոչ հրաձգային զենքերի կիրառմամբ, և մենք ունեցել ենք 3 կորուստ հունիս 16-ին և 1՝ հունիսի 17-ին»,-նշեց Արծրուն Հովհաննիսյանը։
Նա նշեց, որ մեր զորքերը միշտ էլ անհրաժեշտ պատասխան տվել են, ցավոք, կորուստ ենք ունենում, բայց դա չի նշանակում, որ մենք չենք պատասխանում:
Խոսելով Նախիջևանում ադրբեջանական և թուրքական զինված ուժերի մասնակցությամբ մարտավարական զորավարժությունների մասին, Արծրուն Հովհաննիսյանն ասաց, որ ինչպես նախորդը, սա ևս իրականացվում է նորմերի խախտմամբ:
«Պետք է նշեմ, որ ըստ էության, սա այս տարի իրենց երկրորդ մեծամասշտաբ զորավարժությունն է և երկուսի դեպքում էլ միջազգային հանրությունը, Վիեննայի համաձայանագրի համաձայն, իրազեկված չէ: Հերթական անգամ փաստում ենք, որ Ադրբեջանն արհամարում է ցանկացած բնույթի միջազգային պարտավորությունները»,- նշեց Արծրուն Հովհաննիսյանը:
