ԵՐԵՎԱՆ, 18 հունիսի — Sputnik. Հունիսի 18-ին, ժամը 14.13-ին տեղեկություն է ստացվել, որ Ռուսաստանի Դաշնության Տուլայի շրջանում` Մոսկվա-Երևան ավտոճանապարհի 133-րդ կմ-ին, տեղի է ունեցել ՃՏՊ՝ բախվել են «ԿամԱԶ» մակնիշի բեռնատար ավտոմեքենան և միկրոավտոբուսը: Այս մասին տեղեկացնում է ԱԻՆ լրատվական ծառայությունը:
Ըստ նախնական տվյալների՝ պատահարի հետևանքով մահացել է 1, տուժել՝ 6 քաղաքացի, որոնց թվում կան ազգությամբ հայեր: Տվյալները ճշտվում են:
Դեպքի ականատես Մենուա Մեհրաբյանը Sputnik Արմենիայի թղթակցի հետ զրույցում ասաց, որ միկրոավտոբուսի աջ կողմն ամբողջապես ջարդվել է, իսկ քաղաքացին մահացել է տեղում: Մինչև փրկարարների օգնության հասնելը, անցորդներն են փորձել օգնություն ցուցաբերել տուժածներին:
Shamshyan.com-ի տեղեկություններով՝ միկրոավտոբուսում եղել են Հայաստանի քաղաքացիներ, իսկ նշված միկրոավտոբուսը հաշվառված է Շիրակի մարզի Արթիկ քաղաքի Նալբանդյան փողոցի բնակիչ, 42-ամյա Արամ Քոչարյանի անվամբ, սակայն ավտոմեքենան նա չի վարել, այլ Կարապետ անունով քաղաքացին:
