Սևանա լճի ափամերձ գոտում տեղակայված Լճաշեն քաղաքի պեղումների ժամանակ դամբարաններից մեկում նավակ է հայտնաբերվել, որը գիտնականների եզրահանգման համաձայն, կառուցվել է մ.թ.ա. երկրորդ հազարամյակում։ Նավը պատրաստված է եղել կաղնու փայտից։,
Իսկ Կարճաղբյուր գյուղում հայտնաբերվել է մ.թ.ա. 6-րդ դարով թվագրված նավակի կավե մոդելը։ Հնագետ Բորիս Գասպարյանը պատմում է շարքի հեղինակներին այն մասին, որ նավակի աշխարհի ամենահին մոդելը հայտնաբերվել է Հայաստանում։ Այն պատրաստվել է 6 հազար տարի առաջ՝ օբսիդիանից։ Գիտնականի կարծիքով` այն խորհրդանշում է ծիսական նշանակություն ունեցող նավը, սակայն դա կարող է լինել նաև Նոյան Տապանի փոքր պատճենը։ Տապանի մասին առասպելները դեռ այն ժամանակ սերնդեսերունդ էին փոխանցվում։
Սևանա լճում օգտագործվող հին նավակները չեն պահպանվել։ Սակայն ակտիվ նավագնացության այլ վկայություններ կան` խարիսխները։ Հազարամյակների ընթացքում դրանք պատրաստվում էին քարերից։ Մի շարք խարիսխներ և ձկնորսության ցանցերի համար նախատեսված սուզագնդիկներ են հայտնաբերվել լճի հյուսիս–արևմտյան վերջավորության մոտ` ցամաքում։ Ակնհայտ է, որ այստեղ նավերի համար անվտանգ ապաստան կար։
Շարքի հեղինակներն ուսումնասիրել են Սևանա լճի հնագույն նավիգացիայի պատմությունը և եկել այն եզրակացության, որ նավակների երկարությունն այն ժամանակ 10 մետրից պակաս չի եղել։ Նավերը տեղաշարժելու համար թիակներ էին օգտագործում։ Իսկ այն, որ լճով նաև առագաստանավեր էին տեղաշարժվում, վկայում են անցյալ և նախանցյալ դարերի հայ նկարիչների մի շարք կտավները։
