Ժամանակին կոմունիստները քանդել են Թբիլիսիի հոյակերտ հայկական վանքային համալիրը, որը եզակի կառույց է եղել Վրաստանում, ասաց Թբիլիսիում «Հայարտուն» հայկական մշակույթի կենտրոնի տնօրեն Լևոն Չիդիլյանը։
Նրանք պատճառաբանել են, թե իբր հայ աշխատավորները ուզում են եկեղեցին քանդել, դիմել են քաղաքային իշխանությանը անցած դարի 30-ական թվականներին, ստորագրահավաք են կազմակերպել, իսկ ով չի ստորագրել՝ շանտաժի են ենթարկել կամ գնդակահարել։
Չիդիլյանը պատմեց, որ իշխանությունները դիմել են նաև հայ հոգևորականներին` պահանջելով եկեղեցին քանդելու թույլտվություն տալ, հոգևորականներից մեկը քաղաքավարի պատասխանել է. «Ես չեմ կառուցել եկեղեցին, որ խնդրեմ քանդել այն», և երկու օր անց նա անհետացել է։
Տաճարը ապաստարան և հոգևոր տուն է եղել բազմաթիվ հայ գործիչների համար, այդ թվում` գրող Հովհաննես Թումանյանի, իսկ տաճարի պանթեոնում թաղված էին զորապետ Միքայել Լորիս-Մելիքովը, ազգությամբ հայ Թբիլիսիի քաղաքապետները, դրամատուրգ Գաբրիել Սունդուկյանը, Ալեքսանդր Մանթաշովը, հոգևորական Գաբրիել Այվազովսկին և ուրիշներ։ Տաճարի և գերեզմանոցի փլուզումից հետո աճյունների փրկված մասերը վերաթաղվել են Խոջիվանքում, մյուս մասը` Սուրբ Գևորգ հայ առաքելական եկեղեցու բակում։
Զրույցն ամբողջությամբ կարող եք ունկնդրել Sputnik Արմենիա ռադիոկայանի միջոցով (FM106)։
