ԵՐԵՎԱՆ, 21 հունիսի — Sputnik. Մոսկվայի «Արարատ» ֆուտբոլային ակումբի փոխնախագահ Անդրանիկ Քերոբյանը Sputnik Արմենիա մամուլի կենտրոնում կայացած տեսակապի ընթացքում նշեց, որ «Արարատը» ձգտելու է առավելագույն արդյունքների հասնել Ռուսաստանի երկրորդ լիգայում ու հենց առաջին իսկ մրցաշրջանում Ռուսաստանի առաջին լիգայի ուղեգիր նվաճել:
«Արարատ» ակումբը հիմնադրելու մտահղացումը եղել է 2011 թվականից, բայց այն հաջողվել է իրագործել միայն այս տարվա ընթացքում: Հիմնադիրը Վալերի Հովհաննիսյանն է, որն էլ ակումբի նախագահն է։ Նա նախկինում եղել է Երևանի «Ուլիսի» ու Արմավիրի «Տորպեդոյի» նախագահը։
Քերոբյանը նշեց, որ «Արարատը» էականորեն տարբերվելու է այդ թիմերից: Առաջին հերթին Մոսկվայի «Արարատը» լինելու է բաժնետիրական ընկերություն, ու բոլոր ցանկացողները կարող են դառնալ ակումբի բաժնետեր:
«Արարատի» գլխավոր մարզիչ Սերգեյ Բուլատովն իր հերթին հավաստիացրեց, որ թիմն իր առջև բավականին լուրջ նպատակներ է դրել ու դրանք իրագործելու համար ունի բոլոր հնարավորությունները:
«Ճիշտ է` «Արարատի» կազմում արդեն ընդգրկված են Ռոման Պավլյուչենկոն ու Մարատ Իզմայիլովը, բայց ֆուտբոլում ոչ թե անուններն են հաղթում, այլ փորձն ու վարպետությունը։ Այդ ֆուտբոլիստները կնպաստեն մոսկովյան «Արարատի» հաջող ելույթներին»,- ասաց նա:
«Արարատի» ֆուտբոլիստ Արտակ Ալեքսանյանն էլ իր հերթին նշեց, որ թիմում հիմա շատ լավ մթնոլորտ է, և բոլոր ֆուտբոլիստներն էլ ակտիվ մարզումներ անցկացնելով ամեն ինչ անելու են ակումբի ղեկավարության նպատակները իրականություն դարձնելու համար:
«Արարատի» կազմում ընդգրկված խաղացողների հիմնական խնդիրը կարող է լինել այն, որ թիմի ֆուտբոլիստներն իրար հետ չեն խաղացել մի թիմում: Բայց առաջիկա ուսումնամարզական հավաքն Ավստրիայում, որտեղ նաև ստուգողական հանդիպումներ են նախատեսված, այդ հարցն էլ կշտկի:
Այն հարցին, թե արդյոք «Արարատի» հիմնական նպատակներից մեկը կարո՞ղ է լինել Հայաստանի ազգային հավաքականի ֆուտբոլիստներ պատրաստելը, Անդրանիկ Քերոբյանն ու Սերգեյ Բուլատովը պատասխանեցին, որ իրենց հիմնական նպատակը նախ ամուր հիմքերով ակումբ ստեղծել է: Իսկ հավաքականների հետ կապված շատ ուրախ կլինեն, եթե «Արարատի» ֆուտբոլիստներից ոմանք հայտնվեն ազգային հավաքականներում, ընդ որում` և՛ Հայաստանի, և՛ Ռուսաստանի:
Նոր հիմնադրված ակումբի համար, իհարկե, առաջնային կարևորություն ունեն ֆինանսական հիմքերը: Այդ առումով ակումբի փոխնախագահը նշեց, որ Մոսկվայի «Արարատի» բյուջեն արդեն հաստատված է առաջիկա երեք տարիների համար, և երկրորդ լիգայում թիմի բյուջեն երրորդը կամ չորրորդ է:
Բացի այդ, չի բացառվում, որ մոսկովյան «Արարատը» շատ շուտով սկսի համագործակցել Երևանի «Արարատի» հետ:
