ԵՐԵՎԱՆ, 22 հունիսի — Sputnik. ԱԺ-ը 64 կողմ, 31 դեմ ձայներով ընդունեց կառավարության 2017-2022 թթ. գործունեության ծրագիրը:
Մինչ քվեարկությունը ընդդիմադիր «Ելք» խմբակցության ղեկավար Նիկոլ Փաշինյանը հայտարարեց, որ դեմ են քվեարկելու ծրագրին: «Ծառուկյան» խմբակցության ներկայացուցիչ, ԱԺ փոխնախագահ Միքայել Մելքումյանը ևս հայտարարեց, որ խմբակցության համար ծրագիրն անընդունելի է:
ՀՀԿ-ն ու ՀՅԴ-ն հայտարարեցին, որ կողմ են քվեարկելու, քանի որ ծրագիրը լավատեսական և իրատեսական են համարում:
Եզրափակիչ ելույթում վարչապետ Կարեն Կարապետյանն անդրադարձավ քննարկման ընթացքում ընդդիմության հնչեցրած քննադատություններին: ՙՄենք մեր ծրագրում այդ պրոբլեմները ֆիքսել ենք, ասել ենք, որ լուծում ենք տալու։ Կային առարկայական առաջարկություններ և կային էմոցիոնալ ելույթներ, իմ կարծիքով՝ ոչ կոռեկտ, անձնական, ոչ հեռանկարային։ Ուղղակի հորդոր՝ ճիշտ չէ դա»,-ասաց վարչապետը:
Վարչապետը վստահեցրեց, որ ներկայացված ծրագիրը պրոֆեսիոնալ է, և պետությունը փոխելու է դեպի լավը։ Ավարտելով ելույթը՝ նա բոլորին մաղթեց լավ տրամադրություն:
