ԵՐԵՎԱՆ, 28 հունիսի — Sputnik. Կեղծ դիպլոմներ տալու փաստով քրեական գործերը հարուցվել են իսրայելական մամուլում հրապարակված հայտարարություններից առաջ։ Այս մասին Sputnik Արմենիային հայտնեցին Ազգային անվտանգության ծառայության մամուլի ծառայությունից։
Ավելի վաղ Իսրայելի առողջապահության նախարարությունը դիմել էր ոստիկանությանը` խնդրելով ստուգել հայկական նմուշի փաստաթղթեր ունեցող որոշ ատամնաբույժների դիպլոմների վավերականությունը։ Իսրայելի առողջապահության նախարարությունն ավելի քան երկու տարի է` չի հաստատում հայկական բուհերի տրամադրած հարյուրավոր դիպլոմները։
Ինչպես Sputnik Արմենիային հայտնեցին Ազգային անվտանգության ծառայությունից, Հայաստանի ԱԱԾ-ն քրեական գործ է հարուցել երեք ոչ պետական բուհերի ռեկտորների դեմ, որոնք կեղծ դիպլոմներ են տվել դասախոսությունների չհաճախած, ընթացիկ ու ավարտական քննությունները չհանձնած անձանց։ Պարզվել է, որ այդ անձանցից միայն մեկն է Իսրայելի քաղաքացի եղել։
ԱԱԾ-ի տվյալների համաձայն` այդպիսի դիպլոմներ տրվել են Հայաստանի 2 քաղաքացու, Իրանի 1, ԱՄՆ-ի 8, Ուզբեկստանի 1, Ռուսաստանի 1, Վրաստանի 5 քաղաքացու։
Մեղադրական որոշմամբ երկու գործերը դատարան են ուղարկվել։ Ռեկտորները ՀՀ քրեական օրենսգրքի 200 հոդվածի 3-րդ մասով և 214 հոդվածի 1-ին մասով նախատեսված հանցագործություն կատարելու համար մեղավոր են ճանաչվել։ Երրորդ գործի քննությունը շարունակվում է։
Բացի երեք ռեկտորներից, քրեական գործով (200-րդ հոդվածի առաջին մասով) անցում է ՀՀ և ԱՄՆ քաղաքացի, որն առևտրային կաշառք տալով, ըստ էության միջնորդ է հանդիսացել ԱՄՆ քաղաքացիների համար դիպլոմներ ստանալու հարցում, նրա նկատմամբ հայտարարվել է հետախուզում։
Երկու դեկանների, ինչպես նաև թվով երկու այլ անձանց նկատմամբ «որոշում է կայացվել գործուն զղջալու հիմքով քրեական հետապնդում չիրականացնելու մասին, քանի որ նրանք աջակցել են հանցագործությունը բացահայտելուն»։
ՀՀ ԿԱ ԱԱԾ քննչական վարչության կողմից այս տարվա փետրվարի 17-ին միջնորդագիր է ուղարկվել ՀՀ կրթության և գիտության նախարարություն՝ ոչ պետական ԲՈՒՀ-երում հայտնաբերված խախտումները վերացնելու և հետագայում բացառելու ուղղությամբ միջոցներ ձեռնարկելու համար։
ԱԱԾ-ից հայտնեցին, որ ստուգում են 20 շրջանավարտների տվյալները՝ նրանց ավարտական դիպլոմների վավերականության հարցը քննարկելու համար։
«Դատալեքս» տեղեկատվական համակարգում ներկայացված տեղեկության համաձայն` խոսքը «Պրոգրես-համալսարան» ԱԿ-ի և «Երևանի Ավետիք Մկրտչյանի անվան տնտեսագիտական համալսարան» ՍՊԸ-ի ռեկտորների մասին է։
Առաջին դեպքում դիպլոմ է տրվել ԱՄՆ-ում բնակվող 7 մարդու, ինչի համար ռեկտորը 5900 դոլարի չափով կաշառք է ստացել, ինչպես նաև չհավատարմագրված դիպլոմ է փոխանցվել Իրանի քաղաքացուն։ Երկրորդ դեպքում ռեկտորը դիպլոմ է տվել 10 տարի առաջ համալսարանից դուրս մնացած անձին։ Դրա դիմաց ռեկտորը ստացել է 900 հազար դրամ։
