ԵՐԵՎԱՆ, 1 հուլիսի — Sputnik. Հավսա՛ր, զգա՛ստ, ծառայում եմ Հայաստանի Հանրապետությանը. ամբողջ երկու տարի նրանք՝ զինակոչիկները, կլսեն այս արտահայտությունները։ ՀՀ նախագահի հրամանագրով այսօր մեկնարկեց ամառային զորակոչը։
Կենտրոնական հավաքակայանից ներս մտնելուն պես տղաները դադարում են պատանի լինել ու այդ ընդամենը մեկ քայլը կերպարանափոխում է նրանց՝ դարձնում հասուն, ավելի տղամարդկային ու ավելի գրավիչ. նրանք գնում են պահպանելու ու պաշտպանելու հայրենիքը։
Դեռ չճանապարհած՝ կարոտով իրենց նայող հարազատներին էլ հանգստացնում են՝ «էլ ինչ տղամարդ, որ չծառայի»։
Թե կոնկրետ ուր են գնում՝ շատ թափանցիկ են ընտրում. վիճակահանությամբ։ ՊՆ-ն նաև հոգացել է, որ այսուհետև հավաքակայան ոտք դնելուն պես իսկական զինվորի տեսքով լինեն. համազգեստ, ուտելիք է տրամադրում, բանակային կյանքը սկսված է…
Նշենք, որ 2017 թ. ամառային զորակոչի օրինականության ապահովման, զորակոչի ընթացքում քաղաքացիների բողոքներին արագ արձագանքելու և լուծումներ տալու նպատակով պաշտպանության նախարարի հրամանով ստեղծվել է հանձնաժողով:
Քաղաքացիների դիմում-բողոքներն ընդունվում են շաբաթվա բոլոր աշխատանքային օրերին` ՀՀ պաշտպանության նախարարին կից հասարակական խորհրդի աշխատավայրում (հասցեն` Մոսկովյան 5): Լրացուցիչ տեղեկությունների համար զանգահարել Հասարակական խորհուրդ` 010-52-34-82 կամ ՊՆ թեժ գիծ` 1-28 հեռախոսահամարներով:
Զինվորների հպարտ ու հուզված հարազատները, նաև՝ Sputnik Արմենիան, նրանց մաղթում են խաղաղ ու անփորձանք ծառայություն։
