Սերժանտ Ռոման Նահապետյանը խաղաղապահ դարձավ 2009 թվականին։ Նրա որոշման վրա ազդեց զինվորական ընտանիքից լինելը, նաև արտասահմանյան ուղևորությունների հեռանկարները և օտարերկրացի զինվորականներ հետ շփումը։ Ամեն երկրում խաղաղապահներին տարբեր բարդություններ են սպասում։
Խաղաղապահները, երբեմն, ազատ ժամանակ են ունենում, բայց այդ ժամանակը կայանի տարածքում են անցկացնում։ Նրանք, իհարկե, չեն կարող ուղղակի զբոսնել քաղաքում։ Ինչպես ասում է Ռոմանը` ավելի լավ է երեկոներն անցկացնել այլ երկրներից գործընկերների հետ։ Նրանց մի բան է միավորում` կարոտը հայրենիքի հանդեպ և վերադառնալու ցանկությունը։ Ինչ վերաբերում է հայ խաղաղապահների վերաբերմունքին, ապա նրանք արդեն հասցրել են օտարերկրյա գործընկերների հարգանքին արժանանալ։
Ռոմանի գործընկերը՝ մեծ փորձ ունեցող խաղաղապահ Գեղամ Հովհաննիսյանը, բրիգադում է 2004 թվականից։ Նա օգնել է խաղաղության հաստատմանը ոչ միայն Կոսովոյում և Աֆղանստանում, այլև Լիբանանում, ուր հայ խաղաղապահներին հատուկ հյուրընկալությամբ էին ընդունում։ Գեղամը նույնպես զգում է` ինչպես է փոխվել վերաբերմունքը հայերի նկատմամբ խաղաղապահ առաքելությունների շրջանում։
Զորամասի մուտքի մոտ կա լուսանկար, որում պատկերված է մի այլ խաղաղապահ. Սևան Պողոսյանը` հայկական դրոշը ձեռքին։ Խաղաղապահներից մեկը, որն արդեն հասցրել է ծառայել Իրաքում, ասում է, որ հաճախ է տեղացիներին հումանիտար օգնություն ցուցաբերել։ Իրաքցիները, որոնք աշխատում էին կայանում, հաճախ շնորհակալություն էին հայտնում նրանց։
Սևանը չի թաքցնում, որ առաջին գործուղման ժամանակ ամենադժվարը ոչ թե ծառայությունն էր, այլ ընտանիքից հեռու գտնվելը։ Հայ խաղաղապահների ծառայությունը գնահատում են ըստ արժանվույն, ասում է Սևանը։ Նրանք վերադառնում են շնորհակալագրերով։ Խաղաղապահն ամաչելով խոստովանում է, որ իր փոքր ներդրումն ունի աշխարհում խաղաղության պահմանման գործընթացի մեջ։
Ավելի ջերմ հարաբերություններ հայ խաղաղապահները հաստատեցին Կոսովոյում սերբերի հետ։ Հայերի և սերբերի շփման գաղտնի նշանների մասին պատմում է Գևորգ Կարապետյանը։
Հայ խաղաղապահները մասնակցում են միջազգային խաղաղապահ առաքելությանը 2004 թվականից։ Տվյալ պահին Հայաստանի ԶՈՒ խաղաղապահ բրիգադի զինծառայողները մասնակցում են առաքելություններին Աֆղանստանում, Կոսովոյում և Լիբանանում։