ԵՐԵՎԱՆ, 3 հուլիսի — Sputnik. Բանաստեղծ և մանկագիր Ղուկաս Սիրունյանը մահացել է 68 տարեկանում։
Նրա հոգեհանգիստը տեղի կունենա հուլիսի 3-ին, ժամը 18-00 Կոնդի սուրբ Հովհաննես եկեղեցում: Հուլիսի 4-ին ժամը 11-ին հանգուցյալի աճյունը կդրվի գրողների տանը (Բաղրամյան 3), որտեղից ժամը 12-ին սգո թափորը կուղևորվի Արագածոտնի մարզի Ուջան գյուղ՝ Սիրունյանների ընտանեկան գերեզմանոցում թաղումը կատարելու համար:
Ղուկաս Սիրունյանը ծնվել է 1949թ. դեկտեմբերի 18-ին Ուջան գյուղում (այժմ` ՀՀ Արագածոտնի մարզ):
1971 թվականին ավարտել է Երևանի պետական համալսարանի բանասիրական ֆակուլտետը, այնուհետև հայոց լեզու և գրականություն է դասավանդել Սևանի Գեղամավան գյուղի դպրոցում,1972-1978 թվականներին աշխատել է «Աշտարակ» թերթի խմբագրությունում, 1978-1989 թվականներին՝ «Գարուն» ամսագրում՝ որպես պոեզիայի բաժնի վարիչ։
1989-1992 թվականներին աշխատել է Հայաստանի մշակույթի ֆոնդում, 1992-1993 թվականներին՝ ռադիոհեռուստապետկոմում՝ որպես մանկապատանեկան հաղորդումների գլխավոր խմբագիր, 1993-1994 թվականներին՝ «Ազատամարտ» թերթում, 1996-1997 թվականներին՝ Արագածոտնի մարզային «Կանթեղ» թերթում, 1997-1998 թվականներին՝ «Պարտեզ» մանկական ամսագրում՝ գլխավոր խմբագիր։
1998-2010 թվականներին եղել է ՀՀ պաշտպանության նախարարության լրատվության և քարոզչության վարչության գլխավոր խմբագիրը։
Գրել է մեծերի և մանուկների համար։ Նրա ստեղծագործությունները թարգմանվել են մի քանի լեզվով։ Գրել է նաև կինոսցենարներ։ Ավելի քան 23 գրքի հեղինակ է։
1988թ. «Աստղածաղիկ» մանկական բանաստեղծությունների ժողովածուի համար արժանացել է ՀԳՄ Ստեփան Զորյանի անվան մանկապատանեկան գրականության մրցանակի։ 2007թ. «Ուշացած կապիկներ» վեպի համար արժանացել է «Հայը 21-րդ դարասկզբին» գրական մրցանակի: Իսկ 2011թ. «Տառափնջիկ» մանկական ժողովածուն արժանացել է ՀԳՄ Վախթանգ Անանյանի անվան մանկապատանեկան գրականության մրցանակի։
