ԵՐԵՎԱՆ, 10 հուլիսի — Sputnik. Վաշինգտոնի համալսարանի գիտնականները փորձարկել են բջջային սարքը, որի աշխատանքի համար մարտկոց պետք չէ։ Այս մասին հայտնում է The Next Web-ը։
Պարբերականը հայտնում է, որ գիտնականներին հաջողվել է ազատվել սովորական բջջային հեռախոսներում առկա էներգատար գործընթացից։
Ելքային և մուտքային զանգերի համար նրանք կիրառել են սարքի բարձրախոսի վիբրացիան։ Այդ պատճառով հեռախոսը չի կարող ձայնային տեղեկությունը միաժամանակ ստանալ և ուղարկել։ Այս սարքի սեփականատերը խոսելու ընթացքում պետք է սեղմած պահի կոճակը։
Բջջային սարքն էներգիա է ստանում ռադիոազդանշաններից, որը վերցնում է հիմնական կայանից։ Այն միանում է բջջային ցանցին Skype-ի միջոցով։ Մշակողները հայտնում են, որ նման կայաններ կարող են տեղադրվել բջջային կապի աշտարակներին և Wi-Fi երթուղատարներին, ինչը թույլ կտա սարքերի շարժունակություն ապահովել։ Այժմ այդ սարքերը կարող են աշխատել կայանից 15 մետր հեռավորության վրա։