ԵՐԵՎԱՆ, 12 հուլիսի — Sputnik. ԱԺ փոխնախագահ Էդուարդ Շարմազանովը գործնականում բացառում է լայնածավալ պատերազմի հավանականությունը։
«Բացառում եմ լայնամասշտաբ պատերազմը, որովհետև դա թույլ չեն տա մեծ տերությունները, ձեռնտու չէ նրանց», – Sputnik Արմենիա մամուլի կենտրոնում կայացած ասուլիսի ընթացքում ասաց Շարմազանովը։
Նրա խոսքով՝ որևէ մեկն Ադրբեջանին թույլ չի տա նոր, մեծ թեժ կետ բացել սիրիական տարածաշրջանին մոտ, որովհետև դա հղի է լուրջ հետևանքներով:
Ըստ Շարմազանովի` ապրիլյան քառօրյա պատերազմը լայնածավալ չէր, թեև տարբերվում էր ռազմական ուժերի ներգրավվածության ծավալներով։ Ընդ որում, փոխխոսնակի կարծիքով, սադրանքներ շփման գծում կարելի է սպասել նաև ապագայում։
«Քանի դեռ Ադրբեջանը բանակցային գործընթացում ամբողջական չի վերադարձել ու մտել բանակցային փուլ, ես այդ երկրից ոչ մի տրամաբանված գործողություն չեմ սպասում։ Չեմ բացառում, որ կշարունակվեն նման գործողությունները, բայց պիտի հաշվարկեն, որ իրենց կորուստներն ավելի շատ են լինելու, արդյունքի էլ չեն հասնելու, ինչպես ապրիլին չհասան, այլ ֆիասկո ապրեցին, որևէ բնակավայր Ադրբեջանը չկարողացավ վերցնել», – ասաց Շարմազանովը։
Միևնույն ժամանակ փոխխոսնակը կարծում է, որ Հայաստանը պետք է պատրաստ լինի ցանկացած անկանխատեսելի իրադարձության։
