Աննա Պետրոսյան, հատուկ Sputnik Արմենիայի համար
Հայաստանում կան ռուսական բուհեր, որտեղ դասավանդումն իրականացվում է ռուսաց լեզվով։ Պետք է նշել, որ այդ բուհերի շրջանավարտներից շատերն աշխատանք գտնելու խնդրի առաջ են կանգնում։ Ուրեմն ո՞րն է այդ բուհերի գործունեության նպատակը։
Կարևորը սովորել սովորեցնելն է
Մոսկվայի պետական համալսարանի (ՄՊՀ) մասնաճյուղը երկու տարվա պատմություն ունի Երևանում։ Մասնաճյուղը վեցերորդն է այդ բուհի համակարգում, վերջերս նաև համատեղ համալսարան է ստեղծվել Չինաստանում։ Երևանի մասնաճյուղի տնօրենի խոսքով` շրջանավարտները ստանում են նույն ՄՊՀ դիպլոմը, որը տրվում է Մոսկվայում: Իսկ այդ դիպլոմն ընդունվում է ամբողջ աշխարհում, նշանակում է` ՄՊՀ–ում ուսանելուց հետո կարելի է աշխատանքի տեղավորվել ինչպես Հայաստանում և Ռուսաստանում, այնպես էլ` արտերկրում։
«Մեզ մոտ` ՄՊՀ–ում, ասում են` պետք է սովորել սովորեցնել։ Մասնաճյուղի առանձնահատկությունն այն է, որ բուհն իր ուսումնական ծրագիրն ունի, որը Մոսկվայի ծրագրից տարբերվում է ընդամենը 2-3 կետով։ Երևանում ուսանողներն ուսումնասիրում են նաև հայոց լեզու և հայ ժողովրդի պատմություն», – ասաց Ռեյմերսը։
Այս տարի ՌԴ կրթության նախարարությունը ՄՊՀ երևանյան մասնաճյուղի համար 15 բյուջետային տեղ է հատկացրել, որը բուհ ընդունվող ուսանողների առավելագույն քանակի 1/10-րդ մասն է կազմում։
«Ուսման վճարը բարձր է։ Պրոֆեսորադասախոսական կազմի 70 տոկոսը Մոսկվայից է գալիս, այդ պատճառով սա վնասաբեր նախաձեռնություն է։ ՄՊՀ–ն ուսանողների միջոցով գումար չի աշխատում, որովհետև սա բիզնես նախագիծ չէ։ Մեր նպատակը մշակութային ու կրթական տիրույթը միավորող վերնախավ ձևավորելն է», – ասաց Ռեյմերսը։
Բուհը մտադիր է Երևանում ուսումը կազմակերպել 6 ուղղությամբ` լրագրություն, իրավագիտություն, տնտեսագիտություն, լեզվաբանություն, կիրառական մաթեմատիկա և միջազգային հարաբերություններ։ Տնօրենի խոսքով` դիմորդների թիվն այս տարի ընդհանուր առմամբ մեծ չէ։ Մի շարք հայկական բուհերում էլ դիմորդների պակաս կա։
«Ամենայն հավանականությամբ, այստեղ համակարգային խնդիր կա։ Ինձ ասում էին, որ 12-ամյա ուսուցմանն անցնելն է նման անկման հանգեցրել։ Բացի այդ, մեր ոլորտի վրա զգալի ազդեցություն է ունենում նաև ժողովրդագրական խնդիրը», – ասաց գիտնականը։
Համարձակ որոշում, իսկ արդյունքը նույնն է
Անկախ նրանից, որ ՄՊՀ–ի գլխամասային և երևանյան մասնաճյուղի ուսանողների դիպլոմները նույնն են, ուսման վճարները տարբեր են։ Մասնաճյուղում սովորելը 30-35%–ով էժան է։ Այսինքն տարածաշրջանում բնակվող դիմորդները կարող են ընտրել ոչ թե Մոսկվան, այլ` Երևանը կամ Դուշանբեն։ Մնում է, որ նրանք կարողանան այդ համարձակ որոշումը կայացնել։
«Տարածաշրջանի դիմորդները, որոնք ուզում են անվճար սովորել Մոսկվայում, հասկանում են, որ մայրաքաղաքային կյանքը թանկ է, և նրանց ավելի ձեռնտու կլինի ընդունվել ՄՊՀ մասնաճյուղերից մեկը, քանի որ այդ քաղաքներում սպառողական գների մակարդակը զգալիորեն ցածր է, կլիմայական պայմաններն էլ` ավելի լավը», – նշեց Ռեյմերսը։
Տնօրենի խոսքով` իրեն զարմացնում է այն տեսակետը, թե մասնաճյուղը լիարժեք բուհ չէ։ ՄՊՀ դասախոսը բոլորի առաջ նույն պահանջներն է դնում։ Նա դասախոսություններ է կարդում առաջին կուրսի համար և՛ Երևանում, և՛ Մոսկվայում, գնահատում է նույն սկզբունքով, իսկ բուհն ավարտելիս ուսանողը ստանում է այն նույն դիպլոմն ու գիտելիքները, որը ստանում են Մոսկվայում։
