ԵՐԵՎԱՆ, 17 հուլիսի — Sputnik. Ռուսաստանը փորձում է կազմակերպել Հայաստանի և Ադրբեջանի նախագահների` Սերժ Սարգսյանի և Իլհամ Ալիևի հանդիպումը մինչև այս տարվա վերջ, հայտնում է «Իզվեստիա» թերթը` հղում անելով Ռուսաստանի արտաքին գործերի նախարարությանը։
Մոսկվան այդ հարցով գլխավոր միջնորդն է, քանի որ Մինսկի խմբի այլ համանախագահների փորձերը՝ Բաքվի ու Երևանի ներկայացուցիչներին բանակցությունների սեղանի շուրջ նստեցնել, չավարտվեցին հաջողությամբ, նշվում է հոդվածում։
«Ֆրանսիացիները փորձել են բանակցությունների սեղանի շուրջ նստեցնել Բաքվին ու Երևանին, բայց դա ոչ մի օգուտ չտվեց։ Իսկ երկխոսության պահպանումը սկզբունքային նշանակություն ունի։ Հենց դրա շնորհիվ է, որ տարածաշրջանում լայնածավալ պատերազմ չսկսվեց, սակայն կողմերի նպատակներն ու տեսլականները դեռ տարբեր են»,– ճշտել է պարբերականի զրուցակիցը։
Թերթը հիշեցնում է, որ ավելի վաղ ԵԱՀԿ արտգործնախարարների ոչ պաշտոնական հանդիպման ժամանակ Ռուսաստանի արտգործնախարար Սերգեյ Լավրովը ավստրիական Մաուերբախում բանակցություններ է անցկացնել ադրբեջանցի և հայ իր գործընկերների հետ։ Հենց այնտեղ էլ առաջարկվել է երկու անդրկովկասյան երկրների առաջնորդների հանդիպումը կազմակերպել։
Մինչ այդ` ՀՀ ԱՆԳ–ում բարձր են գնահատել Ռուսաստանի միջնորդությունը և կարևորել են բանակցային գործընթացը։