ԵՐԵՎԱՆ, 18 հուլիսի — Sputnik. Հայաստանի ֆուտբոլի ազգային հավաքականի և «Մանչեսթեր Յունայթեդի» կիսապաշտպան Հենրիխ Մխիթարյանը գոլի հեղինակ դարձավ «Ռեալ Սոլթ Լեյքի» հետ ընկերական խաղում:
Սենդի քաղաքի «Ռիո Տինտո» մարզադաշտում կայացած խաղում մանկունիացիները 2:1 հաշվով հաղթանակ տարան:
Հատկանշական է, որ խաղի հաշիվ բացեցին ՌՍԼ-ի ֆուտբոլիստները. արդեն 20-րդ րոպեին Լուկաս Սիլվան գրավեց մանկունիացիների դարպասն ու առաջ մղեց իր թիմին: Իսկ ՄՅՈւ-ի կազմում հաշիվը հավասարեցրեց Հայաստանի ազգային հավաքականի կիսապաշտպան Հենրիխ Մխիթարյանը:
Հայ ֆուտբոլիստն աչքի ընկավ հանդիպման 29-րդ րոպեին՝ ՄՅՈւ-ի ֆուտբոլիստների լավ կոմբինացիայից հետո տուգանայինի մատույցներից կատարած շեշտակի հարվածով գնդակն ուղարկելով մրցակցի դարպասը:
Նշենք, որ ՄՅՈւ-ն ԱՄՆ-ի առաջին ստուգողական խաղում 5:2 հաշվով հաղթել էր «Լոս-Անջելես Գելեքսիին», Մխիթարյանն այդ խաղում ևս դարձել էր գոլի հեղինակ:
