ԼՂՀ ԱԺ հատուկ նիստը, որ առաջին անգամ է անցնում նոր կանոնակարգով և Սահմանադրությամբ նախատեսված է ԼՂՀ նախագահի անուղղակի ընտրության համար, անցավ փոք-ինչ հուզական մթնոլորտում։ Նիստի ավարտին, պատասխանելով լրագրողների հարցերին, ասաց ԱԺ նախագահ Աշոտ Ղուլյանը։
«Ինձ թվում է, որ Արցախի խորհրդարանը նոր քաղաքական մշակույթ է իրականացնում ս.թ. փետրվարին ընդունված ԼՂ Սահմանադրությունը կիրարկելու իմաստով»,- ասաց Ղուլյանը` շնորհավորելով Արցախի ժողովրդին ու խորհրդարանում ներկայացված քաղաքական ուժերին։
«Կարծում եմ` տարբերակում չպիտի լինի` թեկնածուն պարտվել է, թե հաղթել, քանի որ հաղթել ենք բոլորս, որովհետև մեզ հաջողվել է անցկացնել կարևոր քաղաքական մի գործընթաց, որի արդյունքում ԼՂ խորհրդարանն ընտրեց Արցախի նախագահին։ Նա 2017թ-ի սեպտեմբերին կանցնի իր լիազորությունների կատարմանը»,- ասաց Արցախի խորհրդարանի նախագահը։