ԵՐԵՎԱՆ, 20 հուլիսի — Sputnik. Կառավարության հերթական նիստի ժամանակ ՀՀ տարածքային կառավարման ու զարգացման նախարար Դավիթ Լոքյանը տեղեկացրեց «Մաքուր Հայաստան» ծրագրի ընթացքի ու դրա վերաբերյալ նոր փաստաթղթի ստորագրման մասին։ Իսկ նիստից հետո նա մանրամասներ ներկայացրեց լրագրողներին։
Լոքյանը կառավարության նիստի ժամանակ հայտնեց, որ Հայաստանում արդեն 2300 աղբավայր է փակվել։ Մինչև տարվա վերջ նախատեսվում է ունենալ 126 աղբավայր։ Դրանք էլ, ըստ համապատասխան կարգի, պետք է ցանկապատվեն ու հարմարեցվեն նորմատիվներին։ Նախարարը հայտնեց, որ շաբաթօրյակները պետք է շարունակվեն, իսկ էկոկրթությունը դառնա պարտադիր։
Գործադիրի նիստից հետո լրագրողների հետ զրույցում նա նշեց, որ Հայաստանում շատ են մեքենայի պատուհանից կամ քայլելիս դատարկ շիշ ու տոպրակներ նետող մարդիկ։
«Ցավում եմ, որ մենք նախկինում չենք ձևավորել այդ մշակույթը, որ մեզանից յուրաքանչյուրը հասկանա` մեքենայի պատուհանից դատարկ շիշ չի կարելի շպրտել Սևան-Երևան կամ Ապարան գնացող ճանապարհին։ Ամեն շաբաթ ճանապարհաշինարարները, մարզպետարանները մաքրում են այդ տարածքները, բայց նորից հայտնվում են այն աղբի կուտակումները, որոնց մասին մենք խոսում ենք»,- ասաց Լոքյանը։
Այն դիտարկմանը, որ հանրապետության ամբողջ տարածքում քիչ են աղբամանները, նախարար Լոքյանը պատասխանեց` եթե աղբաման չկա, ես կարող եմ դատարկ շիշը պահել իմ ձեռքում, հենց աղբաման տեսնեմ, թափեմ։ Միաժամանակ նա չհերքեց, որ փողոցներում աղբամանները քիչ են։
«Հաջորդ տարի մենք Հայաստանում 10 հազար աղբամանի գնում կիրականացնենք։ Համայնքները պետք է աղբամաններ գնելու պարտավորություն ֆիքսեն, պետություն էլ ֆինանսական օժանդակություն կցուցաբերի»,- ասաց Դավիթ Լոքյանը։
Տարածքային կառավարման ու զարգացման նախարարը հայտնեց նաև, որ աղբի դեմ պայքարելու նպատակով այժմ պատրաստում են սոցիալական տեսահոլովակներ։ Բոլոր համայնքներում բաժանելու են գլխարկներ և բաժակներ, որոնց վրա գրված կլինի «մաքուր» բառը և համայնքի անումը։ Լոքյանը շտապեց տեղեկացնել, որ դրանց համար պետությունը գումար չի ծախսել, մասնավոր հատվածն է ստանձնել այդ գործառույթները։ Պետությունը գումար չի ծախսել նաև «Մաքուր Հայաստան» ծրագրի իրագործման համար։
