ԵՐԵՎԱՆ, 24 հուլիսի – Sputnik. Վերջերս ԱԻՆ ճգնաժամային կառավարման կենտրոնում ահազանգ է ստացվել` աղջիկը ցանկանում է ցած նետվել բարձրահարկ շենքի տանիքից։
«Սահմանված կարգով անմիջապես իրականացվել է արձագանքում, պարզվել է, որ աղջիկը տանիքում, ականջակալները դրած, պարում է։ Հեռվից տարօրինակ է թվացել»,–ժպիտով պատմեց Խանգելդյանը։
Մի անգամ էլ ահազանգ է ստացվել, թե ամուսինը ծեծում է կնոջը։
«Պարզվել է, որ տղամարդը բույս է աճեցրել, հավանաբար, թմրաբույս է եղել։ Երբ ամուսնու հետ խոսել են, պատմել է, որ կինը վնասել է բույսը, հետո ավելացրել` դե ով էլ լիներ, կծեծեր»,–պատմեց ՃԿԿ պետը։
Ինչ վերաբերում է արտակարգ դեպքերին ու պատահարներին, 2017 թվականի առաջին կիսամյակում հանրապետությունում գրանցվել է 6069 արտակարգ դեպք, պատահար, զոհերը 149–ն են, տուժել է 4866 մարդ։
«Նախորդ տարվա նույն ժամանակահատվածի համեմատությամբ արտակարգ դեպքերի, պատահարների թիվն աճել է 867–ով կամ 16.7 տոկոսով։ 10–ով կամ 7 տոկոսով աճել է զոհերի թիվը, 747–ով կամ 18.7 տոկոսով` տուժածների թիվը։ Հաջողվել է փրկել 131 մարդու, ինչը 28–ով ավելին է նախորդ տարվա նույն ժամանակահատվածում գրանցված ցուցանիշից»,–ասաց Խանգելդյանը։
Նրա տեղեկացմամբ` դեպքերի, պատահարների գերակշիռ մեծամասնությունը բաժին է ընկել ճանապարհատրանսպորտային պատահարներին, հրդեհներին, թունավորումներին։
«1887 հրդեհից զոհվել է 2, տուժել 26 մարդ, 1499 ճանապարհատրանսպորտային պատահարից զոհվել է 101, տուժել 2216 մարդ, 2181 թունավորումից տուժել է 2598, զոհվել 30 մարդ»,–ասաց Խանգելդյանը։
Հիմնականում աճի միտում կա շմոլ գազից թունավովածների շրջանում։ Եթե նախորդ տարի շմոլ գազի թունավորումից մարդ չէր զոհվել, ապա այս տարի զոհերի թիվը 7–ն է։ Հրդեհների թիվն աճել է 481–ով։ Բայց այս պարագայում դժվար է որոշել պատճառը։ Սովորաբար հրդեհների թիվն ավելի քիչ է լինում, երբ տարին անձրևներով առատ է լինում։
Խանգելդյանը, հատկապես այս շրջանում հրդեհներից խուսափելու համար կոչ արեց քաղաքացիներին ամենայն խստությամբ պահպանել անվտանգության կանոնները` բնության գրկում հանգստանալիս, այդ թվում` կրակ վառելուց հետո, անպայման, համոզվել, որ այն հանգցրել են։ Երեկոյան քամիները շատ են, հետևաբար կրակը կարող է արագորեն տարածվել։
2015 թվականին մեկնարկեց մի գործընթաց, երբ հանրապետության բոլոր գազալցակայանները ստուգման ենթարկվեցին։ Արդյունքում գազալցակայաններում դժբախտ պատահարների թիվը նվազեց։