Հովհաննիսյան. Կանադայից Ադրբեջանի գնած զրահամեքենաները ոստիկանության համար են

ԵՐԵՎԱՆ, 25 հուլիսի — Sputnik. Կանադական զրահամեքենաները նախատեսված են ոստիկանական կառույցների համար, Sputnik Արմենիային ասաց ՀՀ ՊՆ մամուլի քարտուղար Արծրուն Հովհաննիսյանը։

Ավելի վաղ CBC News կանադական ռադիոհեռարձակող կորպորացիան հայտնել էր, որ տեղական INKAS Armored Vehicle Manufacturing ընկերությունը պայմանագիր է կնքել Ադրբեջանի ՆԳՆ–ի հետ` հետևակի համար զրահամեքենաների (Armored Personnel Carriers – APC) մատակարարման վերաբերյալ։  Ընկերության տվյալների համաձայն` մի քանի մեքենա արդեն Ադրբեջանում են։ INKAS–ը պայմանագիր էր կնքել նաև «տեղում»` ներկրողի տարածքում APC-ի արտադրման վերաբերյալ։

«Սրանք մեծ հաշվով, ավելի շուտ ոստիկանական ավտոմեքենաներ են։ Ադրբեջանցիները նման մեքենաներ արտադրել են ժամանակին, ընդ որում` հարավ–աֆրիկացիների հետ», – ասաց Հովհաննիսյանը։

Նրա խոսքով` զրահամեքենաների նշանակությունը հարաբերական է, դրանք մարդկանց տեղափոխող «բեռնատարներ» են։

«Նույնկերպ նրանք կարող էին ԿամԱԶներ գնել», – ասաց Հովհաննիսյանը։

INKAS–ի մարքեթինգի և զարգացման գծով փոխնախագահ Ռոման Շիմոնովի խոսքով` INKAS–ը բուն ռազմական նշանակության ավտոմեքենաներ չի արտադրում։

«Հիմնականում մենք ռազմական սարքավորումներ և իրավապահ մարմինների համար նախատեսված ավտոմեքենաներ ենք արտադրում», – ասաց նա։

Ավտոմեքենաներից մեկի նկարագրության մեջ նշվում է, որ այն կարող է կիրառվել բանակային ստորաբաժանումների, հատուկ նշանակության զորքերի և այլ ուժային կառույցների կողմից։