ԵՐԵՎԱՆ, 25 հուլիսի — Sputnik. Հայ ծովանկարիչ Հովհաննես Այվազովսկու տասը ժառանգները Ավստրալիայից Թեոդոսիա կժամանեն նկարչի 200-ամյակի տոնակատարության օրերին։ Այս մասին այսօր Սիմֆերոպոլում տեղի ունեցած մամուլի ասուլիսի ժամանակ հայտնեց Հովհաննես Այվազովսկու անվան Թեոդոսիայի պատկերասրահի քաղաքապետարանի մշակութային հաստատության տնօրեն Տատյանա Գայդուկը, հաղորդում է «Аргументы недели – Крым» պարբերականը։
«Տոնակատարությանը ներկա կլինեն Այվազովսկու ժառանգները։ Մենք հստակ գիտենք, որ լինելու են Միլերների ընտանիքի տասն անդամներ` նրանք Այվազովսկու ժառանգներն են Լամփսիի գծով, բնակվում են Ավստրալիայում», – ասաց նա։
Նկարչի ժառանգները բժիշկներ են, սակայն դա վերաբերում է միայն արական սեռին, թե ինչով են զբաղվում գեղեցիկ սեռի ներկայացուցիչները պատկերասրահի աշխատակիցները կիմանան անձնական ծանոթության ժամանակ, վստահեցրել է պատկերասրահի տնօրենը։
«Տոնակատարությանը մասնակցելու համար հրավիրվել է նաև Այվազովսկու ընտանիքի մյուս շառավիղը` Արցովները, որոնք բնակվում են Մոսկվայում, սակայն կժամանեն նրանք, թե ոչ, դեռ հայտնի չէ»,–հայտնեց Գայդուկը։
Ըստ Գայդուկի հիմա քաղաքն արդեն չի ամաչի հանգուցյալ ծովանկարչի գերեզմանի վիճակի համար։ Այս տարի մարմարը մաքրվել է, չքայքայվելու համար պատվել հատուկ լուծույթով։ Գերեզմանի մերձակա տարածքը նույնպես կարգի են հրավիրել, սակայն այն լրացուցիչ ներդրումների ու վերանորոգման կարիք ունի։
Նկարչի ծննդյան 200-ամյակին նվիրված հանդիսավոր արարողությունը կանցկացվի Թեոդոսիայում, հուլիսի 27-ից 30-ը։
