ԵՐԵՎԱՆ, 26 հուլիսի — Sputnik. Վրաստանի նախկին նախագահ, ներկայիս ուկրաինական ընդդիմադիր Միխաիլ Սահակաշվիլիին զրկել են ուկրաինական քաղաքացիությունից, հայտնում է Sputnik Գրուզիան` հղում անելով Ուկրաինայի Բարձրագույն Ռադայի պատգամավոր Իգոր Մոսիյչուկին։
«Դա ճիշտ է, վրացական յանուկովիչ Միխո Սահակաշվիլիին զրկել են Ուկրաինայի քաղաքացիությունից, և դա վկայում է, որ նախագահ Պյոտր Պորոշենկոն, վերջապես, սկսել է ընդունել սեփական սխալները։ Նա ապօրինի կերպով քաղաքացիություն է տրամադրել և հիմա ուղղում է իր սխալները», – գրել է Մոսիյչուկը իր ֆեյսբուքյան էջում։
Վրաստանի նախկին իշխող «Միասնական ազգային շարժում» (ՄԱՇ) կուսակցությունում, որի ծպտյալ առաջնորդը մնում է Սահակաշվիլին, տվյալ ինֆորմացիային չեն տիրապետում։
«Չգիտեմ։ Առաջին անգամ դրա մասին ձեզանից եմ լսում։ Դա անհեթեթություն է», – «Նովոստի Գրուզիա» լրատվական գործակալությանը ասել է ՄԱՇ–ի պատգամավոր Ռոման Գոցիրիձեն։
«Մենք չենք կարող ո՛չ հաստատել, ո՛չ էլ հերքել այդ տեղեկությունը։ Մենք վերստուգում ենք այն», – ասել է ՄԱՇ–ի աշխատակցուհին։
Վրաստանի նախկին նախագահը չի մեկնաբանել տարածված տեղեկությունը։ Օրերս նա իր ֆեյսբուքյան էջում գրել է, որ գտնվում է ԱՄՆ–ում։
