ԵՐԵՎԱՆ, 27 հուլիսի–Sputnik. Առողջապահության նախարար Լևոն Ալթունյանը գործարկել է պարտադիր առողջապահական համակարգի փորձնական ծրագիրը։ Ըստ նախագծի`սոցփաթեթի շրջանակում պետական ծառայողները կարող են դիմել ցանկացած բուժհաստատություն` ներկայացնելով միայն անձը հաստատող փաստաթուղթ և բժշկական ապահովագրություն, իսկ հավաստագիրը պարտադիր չէ։
Այս ծրագիրը դեռևս փորձնական փուլում է և գործելու է 6 ամիս։
«Ֆինանսական տարվա սկզբին հիվանդանոցներին բաշխվում է ինչ-որ լիմիտավորված գումար։ Այդ գումարի սահմանում նրանք ծառայություններ են մատուցում այն քաղաքացիներին, որոնք դիմել են բուժօգնության համար: Գործող բանաձևի ամենամեծ մինուսն այն է, որ եթե հիվանդանոցը լավ է սպասարկում և հաճախորդների շրջանում պահանջարկ ունի, նրա գումարներն ավարտվում են օրացուցային տարվա ավարտից ավելի շուտ, հերթեր են կուտակվում: Իսկ այն հիվանդանոցները, որոնք առանձնապես հեղինակավոր չեն մեր բնակչության շրջանում, նրանք այդ գումարը ունենում են մինչև տարեվերջ, և ավելանում է այդ գումարը»,– Կառավարության նիստից հետո բացատրեց Ալթունյանը։
Ալթունայնի խոսքով` այսուհետ սոցիալական փաթեթի շահառուների համար նախատեսված գումարները տարվա սկզբում չեն բաշխվի։ Փոխարենը կստեղծվեն ռեզերվային ֆոնդեր ապահովագրական ընկերություններում։ Փորձնական ծրագրին մասնակցել է 80–100 հազար մարդ։ Ծրագրի բարեհաջող ընթացքի պարագայում այդ թիվը կհասնի 612 հազարի։
Ամբողջ գործընթացը տանում է երկրում պարտադիր բժշկական ապահովագրության ներդրմանը։