ԵՐԵՎԱՆ, 28 հուլիսի — Sputnik. ԵԱՀԿ ներկայացուցիչների հետ հանդիպման ժամանակ ԱԳՆ փոխնախարար Աշոտ Հովակիմյանը հայտարարել է, որ Հայաստանի իշխանությունը կշարունակի սերտ գործակցությունը ԵԱՀԿ-ի հետ՝ չնայած, որ այն փակում է գրասենյակը Հայաստանում, հաղորդում է արտգործնախարարության մամուլի ծառայությունը։
«Գրասենյակի իրականացրած ծրագրերը, որոնք հիմնված էին ընդունող երկրի կարիքների վրա, մեծ նպաստ են ունեցել Հայաստանի պետական ինստիտուտների ամրապնդման, անվտանգության ոլորտի, տնտեսական, դատաիրավական բարեփոխումների առաջմղման, զինված ուժերում մարդու իրավունքների պաշտպանության, ժողովրդավարության ամրապնդման ու բազմաթիվ այլ ոլորտներում»,- նշել է Հովակիմյանը:
Նրա խոսքով՝ Հայաստանի իշխանությունները բարձր են գնահատում Երևանի գրասենյակի ներկա և նախկին ղեկավարների ու նրանց անձնակազմի կատարած աշխատանքը:
ԵԱՀԿ գրասենյակը Հայաստանում ձևավորում էր համագործակցության հարթակ և այդ հարթակում ներգրավում էր Երևանում գործող միջազգային կազմակերպությունների գրասենյակներին և հավատարմագրված դեսպանություններին:
«Չնայած գրասենյակի փակմանը, Հայաստանի իշխանությունները մտադիր են բարձր մակարդակի վրա պահպանել Հայաստան-ԵԱՀԿ համագործակցությունը: Մենք հավատարիմ ենք ԵԱՀԿ շրջանակներում ստանձնած հանձնառություններին և պատրաստակամ ենք շարունակել գրասենյակի ծրագրերի իրականացումը հանուն մեր երկրի հետագա զարգացման»,- ասել է փոխնախարարը:
