ԵՐԵՎԱՆ, 2 օգոստոսի — Sputnik. Մարդու իրավունքների պաշտպանի աշխատակազմի աշխատակիցները չհայտարարված այց են կատարել «Նուբարաշեն» քրեակատարողական հիմնարկ: Այս մասին ՄԻՊ Արման Թաթոյանը գրել է ֆեսբուքյան պաշտոնական իր էջում:
Այցի շրջանակում նրանք առանձնազրույցներ են ունեցել հացադուլ հայտարարած «Սասնա ծռերի» անդամներ Վարդան Գերավետյանի և Տիգրան Մանուկյանի հետ:
Վարդան Գերավետյանը, հացադուլով պայմանավորված, հրաժարվել է ընդունել բժշկի նշանակած դեղամիջոցը, իսկ Տիգրան Մանուկյանն առողջության հետ կապված գանգատներ չի ներկայացրել: Աշխատակազմի մասնագետներն ուսումնասիրել են նաև նրանց բժշկական փաստաթղթերը և պահման վայրի պայմանները:
Այցի ընթացքում Մարդու իրավունքների պաշտպանի աշխատակազմի մասնագետները կապ են հաստատել նաև Վարդան Գերավետյանի պաշտպանի հետ:
Հացադուլ հայտարարած անձանց իրավունքների պաշտպանությունն իրականացվում է հատուկ սկզբունքներով և Մարդու իրավունքների պաշտպանի աշխատակազմի մշտական ուշադրության ներքո է:
