ԵՐԵՎԱՆ, 3 օգոստոսի — Sputnik. Sputnik Արմենիա մուլտիմեդիոն կենտրոնում հաղթանակած հավաքականների մարզիչներն ամփոփեցին արդյունքները և ներկայացրեցին այդ մարզաձևի հեռանկարների իրենց տեսլականը:
Կանանց Հայաստանի Մ-16 թիմի գլխավոր մարզիչ Վահագն Հարությունյանը մատնանշեց թույլ մարզիկների բացակայության փաստը, բացի, թերևս, Ջիբրալթարի հավաքականից՝ չթաքցնելով, որ վերջին դերը չխաղաց նաև սպորտային բախտը, որն այս անգամ ժպտաց մեր հավաքականին: Այդ իսկ պատճառով մարզիչը խոսեց գալիք պարապմունքների լրջության մասին, որոնցից էլ կախված կլինի թիմի հետագա հաջողությունը:
«Եվրոպայի առաջնության C դիվիզիոնի չեմպիոն դառնալը մեզ դեռ թույլ չի տալիս մտածել, որ շատ ուժեղ թիմ ունենք: Չեմ ցանկանում աղջիկների և թիմի մասին գովասանքի խոսքեր շռայլել, քանի որ դեռևս շատ անելիքներ ունենք և պետք է նախապատրաստվենք B դիվիզիոնին: Ինչ վերաբերում է C դիվիզիոնին՝ թույլ թիմեր չկային: Ուղղակի, սպորտային հաջողությունը մեր հավաքականի կողմն էր: Մեր քրտնաջան աշխատանքը, հաղթելու մեծ կամքն իր արդյունքը տվեց: Մեկ ամիս ուսումնամարզական հավաք ունեցանք, ինչն իրականում շատ կարճ ժամանակ էր Եվրոպայի առաջնության C դիվիզիոնին պատրաստվելու համար»,- ասաց Վահագն Հարությունյանը:
Տղամարդկանց Հայաստանի Մ-16 թիմի մարզիչ Արեգ Վաթյանը նշեց նախապատրաստման սուղ ժամկետների և թիմում աստիճանաբար հաստատվող հաղթական ոգու կարևորությունը: Մարզման համար հավաքականն ունեցել է ընդամենը 12 օր։
«Գիտակցում էինք, թե ինչ խնդիր կարող ենք ունենալ առաջնության ընթացքում և որ թիմերի հետ: Իրականում, չէինք հավատում, որ մեզ կհաջողվի հաղթել, հաղթանակի նկատմամբ մեր հավատը խաղից խաղ էր գալիս: Աստիճանաբար թիմում մթնոլորտը փոխվեց, սկսեցինք հավատալ, որ կարող ենք հասնել մինչեւ եզրափակիչ»,- ասաց Արեգ Վաթյանը։
Երկու մարզիչներն էլ հավաստիացրեցին, որ չնայած այս զգալի հաջողություններին, իրենց սպասվում է երկար աշխատանք հաջողություններն ամրապնդելու համար։
