ԵՐԵՎԱՆ, 11 օգոստոսի – Sputnik. Լևոն Արոնյանի` Հիկարու Նակամուրայի նկատմամբ տարած հաղթանակը ԱՄՆ-ի Սենթ Լուիս քաղաքում ընթացող շախմատի Սինքֆիլդի գավաթի խաղարկության ժամանակ գրոսմայստերի մոր, տիկին Սեդայի 70–ամյակին նվեր դարձավ։ Այդ մասին Արոնյանը պատմել է ռուսական շախմատային chess-news.ru կայքին։
Գրոսմայստերը նշել է, որ մայրը մեծ ներդրում է ունեցել նրա կայացման գործում։
Chess.com–ի հետ հարցազրույցում Արոնյանը նշել է նաև իր ընտրյալ Արիանա Կաոլիի հետ հարսանիքի օրը։
«Հարսանիքը կկայանա սեպտեմբերի 30–ին Երևանում»,– ասել է շախմատիստը։
Անդրադառնալով սեպտեմբերի սկզբին կայանալիք Աշխարհի գավաթին՝ Արոնյանն ասել է, որ պատրաստվում էր Սենթ Լուիսի պատասխանատու մրցաշարին, իսկ Թբիլիսիում նա հույս ունի հաղթել, որպեսզի թեկնածուների մրցաշար անցնի։
Ինչ վերաբերում է գրոսմայստերի ապագա կնոջը, նա, հնարավոր է, մի քանի օրով Վրաստան գա` ամուսնուն սատարելու համար։