ԵՐԵՎԱՆ, 13 օգոստոսի — Sputnik. Խոսրովի արգելոցում հրդեհաշիջման աշխատանքները շարունակվում են։ Օգոստոսի 12-ին բռնկված հրդեհն առայժմ մարել չի հաջողվում։ Բնապահպանության նախարարության տեղեկություններով՝ «Խոսրովի անտառ» պետական արգելոցում այս պահին հրդեհն ընդգրկել է 200-250 հա բուսածածկ և անտառածածկ տարածք:
Քամին նպաստում է հրդեհի տարածմանը։ Հրդեհաշիջման աշխատանքներին մասնակցում է 78 փրկարար, ՀՀ ՊՆ Արարատի զորամասի 122 զինծառայող, ոստիկանության Արարատի մարզային վարչության՝ 60, անտառտնտեսության՝ 50 աշխատակից, բնապահպանական տեսչության և «Ինտեր Ակվա» ձկնաբուծարանի աշխատակիցները, ինչպես նաև Արարատի մարզի Ուրցաձոր համայնքի բնակիչները:
Հրդեհաշիջման աշխատանքներում ներգրավված է ՀՀ ՊՆ ավիացիայի 2 ուղղաթիռ: Պաշտոնական հաղորդագրությունների համաձայն, արդեն երկրորդ օրն է՝ դեպքի վայրում են ՀՀ ԱԻ նախարար Դավիթ Տոնոյանը, ՀՀ բնապահպանության նախարար Արծվիկ Մինասյանը, փրկարար ծառայության պաշտոնյաները։
Հիշեցնենք. Ըստ ԱԻՆ տեղեկատվության` օգոստոսի 12-ին, ժամը 12:30-ին ահազանգ էր ստացվել, որ Արարատի մարզի Ուրցաձոր գյուղից մոտ 20 կմ հյուսիս՝ «Խոսրովի անտառ» պետական արգելոցի «Զիմա» կոչվող տեղամասում այրվում է բուսածածկ տարածք:
