Երևանի թանգարանի սրահում կարելի է հսկայական ժանիքներով փղի կմախք տեսել։ Ցուցանմուշի երկարությունը 4.5 մետր է, բարձրությունը` 3.5 մետր։ Սակայն այս կենդանին իր ժամանակին հսկա չի համարվել։ Սա ընդամենը հինգ տարեկան փղիկ է եղել, որը Հայաստանի տարածքում է ապրել 1 000 000 տարի առաջ։
Կմախքը հայտնաբերվել է Գյումրի քաղաքի մոտակայքում, սակայն այս գտածոն սենսացիա չի համարվել։ Ավելի վաղ` 1856 թվականին, Խնուսի հովտում (Արևմտյան Հայաստան, ժամանակակից Թուրքիա) բրիտանական երկրաբանական-հետախուզական արշավախումբն արդեն հայտնաբերել էր այդ տեղի համար հազվագյուտ համարվող կենդանու մնացորդներ, որը շատ լավ էր պահպանվել ավազե միջավայրում։
Սկզբում կենդանուն դասել էին մամոնտների շարքը, սակայն ավելի ուշ եզրակացրել էին, որ այն, այնուամենայնիվ, փիղ է։ Քանի որ կենդանու այս տեսակն աշխարհում այլևս ոչ մի տեղ չէր հայտնաբերվել, այն անվանել էին Elefas Armenicus` հայկական փիղ։
Տարիներ անց նմանատիպ կմախք էր հայտնաբերվել Գերմանիայում, և տեղի գիտնականներից մեկն ամեն ինչ արել էր, որ գիտական աշխարհը նախապատմական գտածոյի անվանումը փոխի։ Կենդանուն սկսել են անվանել «սառցային փիղ»։
