«Խոսրովի անտառ» պետական արգելոցի տարածքում հրդեհը բռնկել է օգոստոսի 12-ի կեսօրին։ Հրդեհը սկսվել է Արարատի մարզի Ուրցաձոր գյուղից 20 կմ հյուսիս գտնվող հատվածում։ Արդեն չորրորդ օրն է` տարերքը զսպել չի հաջողվում։
Հայ փրկարարներն ու հրշեջները շարունակում են պայքարել կրակի դեմ, որը Խոսրովի արգելոցի նորանոր տարածքներ է գրավում։
Օգոստոսի 15-ին ԱԻՆ-ի շտաբը տեղափոխվել է Ալմալաղ լեռան մի լանջից մյուսը, որտեղ իրավիճակն ավելի բարդ էր։ Անվտանգության նկատառումներից ելնելով` լրագրողներին թույլ չեն տալիս անցնել բուն արգելոցի տարածք, որտեղ աշխատում է ռուսական Իլ-76-ը։
Հրդեհի գոտու ուղղությամբ իրականացված առաջին թռիչքի ժամանակ ռուս փրկարարներից բացի, ինքնաթիռում է եղել նաև Հայաստանի արտակարգ իրավիճակների նախարար Դավիթ Տոնոյանը։
Ռուսաստանի ԱԻՆ-ի Իլ-76 ինքնաթիռը միանգամից կարող է ավելի քան 42 տոննա ջուր լցնել հրդեհի օջախների վրա, նաև պատսպարման շերտ ստեղծել` 800 մետր երկարությամբ ու 60 մետր լայնությամբ։ Այն աշխարհի ամենախոշոր հակահրդեհային ինքնաթիռներից է։
Կրակի դեմ պայքարը շարունակվում է։
