ԵՐԵՎԱՆ, 16 օգոստոսի — Sputnik. ՀՀ վարչապետ Կարեն Կարապետյանն Արցախի իր պաշտոնակցի հետ ծանոթացել է շրջանում գործող տնտեսական մի շարք նախագծերի:
Վարդենիս-Մարտակերտ մայրուղու և շրջանի հիդրոէլեկտրակայանների շինարարական աշխատանքներին ծանոթանալուց հետո Կարեն Կարապետյանն ու Արայիկ Հարությունյանը մասնակցել են Քարվաճառ քաղաքի մերձակայքում հիմնվող ջրի գործարանի հիմնարկեքին:
«Սա պատմական պահ է, քանի որ Շահումյանի շրջանի համար աննախադեպ չափերի գործարանի հիմք ենք դնում: Այս նախագիծն իրագործվում է օտարերկրյա ներդրումով՝ նպատակ ունենալով մեծ ծավալներով արտահանել Քարվաճառի ջուրը: Այն նշանակալի ազդեցություն է թողնելու շրջանի սոցիալ-տնտեսական զարգացման վրա, քանի որ, ըստ նախագծի՝ սկզբնական փուլում գործարանն ապահովելու է շուրջ 50 աշխատատեղ՝ խթանելով նաև շրջակա տարածքների ենթակառուցվածքների զարգացումը»,-ասել է Արցախի վարչապետը։
Նրա խոսքով` կառավարությունը պատրաստակամ է հնարավորին չափ աջակցել այս ծրագրի իրագործմանը։
