ԵՐԵՎԱՆ, 17 օգոստոսի – Sputnik. Կառավարության հերթական նիստը մեկնարկեց Հայաստանի Հանրապետության միջազգային տնտեսական ինտեգրման և բարեփոխումների նախարար Վաչե Գաբրիելյանի ղեկավարությամբ: Նա ԱԻ փոխնախարար Դավիթ Կարապետյանին նախ խնդրեց զեկուցել հրդեհի հետևանքների և տիրող իրավիճակի մասին:
«Վայոց Ձորում այրվել է շուրջ 15 կմ պարագծով խոտածածկ տարածք, որից 320 հա-ը՝ անտառածածկ: Փորվել են բազմաշերտ խրամատներ` հրդեհի տարածումը բացառելու նպատակով: «Խոսրովի անտառ» պետական արգելոցի տարածքում օգոստոսի 12-ին բռնկված հրդեհի հիմնական օջախները մարվել են երեկ: Մի քանի օր տևած հրդեհաշիջման աշխատանքներն անցնում էին չափազանց անբարենպաստ բնակլիմայական պայմաններում»,-ասաց նա:
Նրա խոսքով՝ նախնական տվյալները փաստում են, որ «Խոսրովի արգելոցի» սահմանում այրվել է 16 կմ պարագծով խոտածածկ տարածք, որից 360 հա-ը՝ անտառ: Խոսրովում և Արտավանում փրկրարաների հետ համատեղ հրդեհաշիջման աշխատանքներին մասնակցել են ԶՈՒ տարբեր ստորաբաժանումների, ոստիկանության հատուկ նշանակության զորքերի ծառայողներ, անտառտնտեսության, բնապահպանության պետական տեսչության, ջրային տնտեսության պետական կոմիտեի աշխատակիցներ, գյուղերի բնակիչներ ու բնապահպաններ:
Փոխնախարարի փոխանցմամբ` իրավիճակը վերահսկողության տակ է: ՌԴ ԱԻՆ ինքնաթիռը շարունակում է օդային հրդեհաշիջման աշխատանքները՝ օջախների կրկնակի բռնկումները բացառելու նպատակով:
