ԵՐԵՎԱՆ, 17 օգոստոսի — Sputnik. ՀՀ արտակարգ իրավիճակների նախարարությունն ունի տեխնիկա, բայց այն բավարար չէ։ Այս մասին գործադիրի նիստից հետո հայտարարեց արտակարգ իրավիճակների փոխնախարար Դավիթ Կարապետյանը։ Իսկ տեխնիկան ձեռք է բերվել նախարարության ունեցած հնարավորությունների սահմանում։
«Ինչո՞ւ չունենք հրդեհաշիջող օդանավ, սա հարց է, որը կապված է ֆինանսի հետ։ Ժխտել, որ ԱԻՆ-ը վերջին տարիներին մեծ արդյունավետություն և առաջընթաց է ունեցել, չի լինի»,- ասաց փոխնախարարը։
Թե ինչու ավելի վաղ չդիմեցին ՌԴ-ի իրենց գործընկերներին, Կարապետյանը պարզ ու հստակ պատասխան ունի` որովհետև չէին պատկերացնում հրդեհի ծավալները։
«Ամսի 12-ին հրդեհի ծավալները փոքր էին, հույս կար, որ այն կարելի էր չեզոքացնել սեփական միջոցներով։ Ամսի 14-ի առավոտյան անմիջապես դիմեցինք ՌԴ մեր գործընկերներին, նույն օրը նրանց ինքնաթիռը Հայաստանում էր։ Մեզ անհրաժեշտ են հրդեհաշիջող ավիացիա, դժվարամատչելի ռելիեֆի պայմաններում աշխատող ամենագնացներ, դրանց ուղղությամբ աշխատանքներ տանում ենք»,- տեղեկացրեց Կարապետյանը։
Փոխնախարարն անդրադարձավ նաև այն խոսակցություններին, թե իբր հրդեհաշիջման ժամանակ անկանոն ու անկազմակերպ իրավիճակ էր։ Նրա խոսքով` այդ տարածքում կապի օպերատորները չէին աշխատում, ուստի առաջանում էին միմյանց հետ կապ հաստատելու խնդիրներ։
Ինչ վերաբերում է այս ու այն կողմից հնչող համոզմունքներին, թե տեղացած անձրևի շնորհիվ էր, որ հրդեհը մարեց, Դավիթ Կարապետյանը պատասխանեց.
«Մենք հակված չենք որևէ հրդեհի դեպքում անձրևի ներգործությունը թերագնահատել, բայց երեկ երկու անգամ կարճատև անձրև է եղել Խոսրովում և բարձր ջերմաստիճանի պարագայում արագ գոլորշիացել է, ցավոք, անձրևի ներգործությունը թույլ է եղել։ Նրանք, ովքեր սլաքներն ուզում են ուղղել անձրևի կողմ, դա անհարգալից վերաբերմունք է այն հարյուրավոր մարդկանց նկատմամբ, ովքեր այս պահին ևս հրդեհաշիջրման աշխատանքներ են իրականացնում»,- ասաց ԱԻ փոխնախարարը։
Նրա խոսքով` այս կարգի հրդեհների պարագայում դժվարություններ են ունենում աշխարհի բոլոր երկրները։
Նշենք, որ Խոսրովի անտառում հրդեհ էր բռնկել օգոստոսի 12-ին։ Դեպքի առթիվ հարուցվել է քրեական գործ, ձեռնարկվում են անհրաժեշտ քննչական և դատավարական այլ գործողություններ հրդեհի առաջացման պատճառը պարզելու համար։
