ԵՐԵՎԱՆ, 21 օգոստոսի – Sputnik. «Հիմնադիր խորհրդարանի» անդամ, «Սասնա ծռերի» գործով շուրջ մեկ տարի կալանքի տակ գտնվող Կարո Եղնուկյանի փաստաբան Տիգրան Հայրապետյանն այսօր հայտարարել է, որ իր պաշտպանյալը քաղբանտարկյալ է։
«Անցել է շուրջ մեկ տարի, բայց դեռ պարզ չէ, թե գործն ինչ փուլում է։ Դատարանը նիստերն անցկացնում է առանց փաստաբանների ու ամբաստանյալների։ Այն տպավորությունն է, որ այդ դատական նիստերը չեն ավարտվելու»,- ասաց Հայրապետյանը։
Եղնուկյանին առաջադրված մեղադրանքները նրա փաստաբանն անհիմն է համարում` նրան «քաղբանտարկյալ» հռչակելով։ Բայց քանի որ ՀՀ օրենսդրությունը «քաղբանտարկյալ» հասկացություն չի սահմանում, փաստաբանն ու իր պաշտպանյալը փորձում են նրա կարգավիճակը հիմնավորել միջազգային իրավական ակտերով։
Փաստաբանի խոսքով` անձին քաղբանտարկյալ համարելը իրավական առումով որևէ կերպ չի ազդի Կարո Եղնուկյանի գործի հանգուցալուծման վրա, բայց թույլ կտա միջազգային կառույցներին ճնշում կիրառել ՀՀ ներպետական մարմինների նկատմամբ։
«Եթե որևէ երկրում կան քաղաքական հայացքների համար բանտարկյալներ, ապա խոսել խոսքի ազատության կամ ազատ գործունեության, ազատ դատաքննության իրավունքի մասին, պատրանքային է։ Սա նաև ահռելի նշանակություն ունի այն հարցում, որ երբ Հայաստանը պետք է ինչ-որ միջազգային միավորի մաս կազմի, այդ պետությունները պետք է հաշվի առնեն, որ այդ երկրում կա քաղբանտարկյալ»,- ասաց Հայրապետյանը։
Նա նաև նշեց, որ «Եղնուկյանը պատրաստվում է նամակով դիմել Եվրոպական կառույցներին` զգուշացնելով, որ Եվրոպան պատրաստվում է ասոցացման պայմանագիր կնքել մի երկրի հետ, որ տեղ կան քաղաքական բանտարկյալներ»։
Հիշեցնենք, որ Եղնուկյանը բողոքարկել էր իր նկատմամբ ընտրված խափանման միջոց կալանքի որոշումը Մարդու իրավունքների եվրոպական դատարանում: ՄԻԵԴ-ում որոշում է կայացվել գանգատը քննել առաջնահերթության կարգով։
«Սասնա ծռերի» գործի շրջանակում ԱՄՆ քաղաքացի Կարո Եղնուկյանը մեղադրվում է պատանդ վերցնելու, շենք-շինություններ, տրանսպորտի, հաղորդակցության կամ կապի միջոցներ զավթելուն աջակցելու համար:
