Չնայած ոսկե մեդալակիրներ Արթուր Ալեքսանյանին և Մաքսիմ Մանուկյանին Հայաստան բերող ինքնաթիռն ուշացավ գրեթե մեկ ու կես ժամ, սպասող երկրպագուների տոնական տրամադրությունը դրանից չփչացավ։
Հատուկ ջերմության արժանացավ աշխարհի եռակի և օլիմպիական չեմպիոն Արթուր Ալեքսանյանը։
«Հպարտ եմ, որ կարողացա դառնալ աշխարհի եռակի չեմպիոն։ Բոլորը տեսան, թե ինչ կատարվեց Վրաստանում, վրաց ըմբիշի հետ մենամարտում։ Կարծում եմ` այստեղ ես ապացուցեցի նրանց, որ ես արժանի չէի նման վերաբերմունքի։ Կփորձեմ էլի լավագույն արդյունքներ ցույց տալ բոլոր այն մրցաշարերում, որտեղ կմասնակցեմ։ Կձգտեմ, որ ամեն ինչ լավ ստացվի նաև 2020–ի օլիմպիական խաղերում»,–լրագրողներին ասաց Արթուր Ալեքսանյանը։
Իր հերթին Հայաստանի հունահռոմեական հավաքականի գլխավոր մարզիչ Լևոն Ջուլֆալակյանն ասաց, որ իր քաշային կարգում Արթուր Ալեքսանյանը լավագույնն էր։
«Միայն թե մարտի ընթացքում նրա ոտքը չսահի։ Աստված նրան ուժ և առողջություն տա, ու թող նրա հաջողությունները շարունակական լինեն»,–ասաց Ջուլֆալակյանը։
Փարիզում կայացած Հունահռոմեական ըմբշամարտի աշխարհի առաջնությունում Մաքսիմ Մանուկյանը ոսկե մեդալ նվաճեց 80 կգ քաշային կարգում, իսկ Արթուր Ալեքսանյանը դարձավ աշխարհի եռակի չեմպիոն 98 կգ քաշային կարգում։
