Թուրքմենստանի նախագահին Հայաստանում դիմավորեց Էներգետիկ ենթակառուցվածքների և բնական պաշարների նախարարը։ Նշելով, որ սա ընդունված արարողակարգ է, քաղտեխնոլոգ Վիգեն Հակոբյանն այդուհանդերձ ուշադրություն է հրավիրում այս փաստին։
«Սա երևի թե ինչ-որ չափով ակնարկ է, որ այս այցի դոմինանտ թեման էներգետիկան է։ Ես կարծում եմ` այս այցը պայմանավորված է նոր էներգետիկ առանցքի ձևավորման գործընթացով։ Այն է` Իրան, Հայաստան, Վրաստանով դեպի Եվրոպա, և այս առանցքին կարող է միանալ նաև Թուրքմենստանը և արաբական աշխարհը, օրինակ` Կատարը»,- Sputnik Արմենիայի հետ զրույցում ասաց Վիգեն Հակոբյանը։
Քաղտեխնոլոգը չբացառեց, որ այս հարաբերությունների խորացման արդյունքում Հայաստանը կարող է գազ ստանալ Թուրքմենստանից և դառնալ տարանցիկ երկիր թուրքմենական գազը Եվրոպա հասցնելու համար։
Ինչ վերաբերում է այս հարցում ՌԴ-ի շահագրգռվածությանը, Վիգեն Հակոբյանի կարծիքով` հնարավոր է, որ Ռուսաստանը կարող է այս նախագծում հանդես գալ ներդրողի դերում։
