ԵՐԵՎԱՆ, 24 օգոստոսի — Sputnik. Սերբիայի հավաքականի և «Մանչեսթեր Յունայթեդի» նախկին ավագ Նեմանյա Վիդիչը հիանալի գիտի, թե ինչ է պաշտպանությունը և խաղացողներից ով կարող է լրջորեն խանգարել այդ գծում խաղացող ֆուտբոլիստներին։ Նա այդ առումով բարձր է գնահատել Հենրիխ Մխիթարյանի հնարավորությունները։ Այս մասին հայտնում է ЕSPNFC ամերիկյան պարբերականը։
«Նա հիանալի ֆուտբոլիստ է, հիանալի տիրապետում է գնդակին, մրցակցի պաշտպանների համար միշտ սպառնալիք է ստեղծում: Հենրիխն ինձ հիշեցնում է Դիմիտար Բերբատովին, երբ նա դեռ նոր էր հայտնվել ՄՅ–ում։ Միակ բանը, որ կցանկանայի փոխել նրա խաղում, գոլերի թիվն է: Կասկած կա, որ նրան ավելի շատ դուր է գալիս պահեր ստեղծել իր թիմակիցների համար, քան ինքնուրույն աչքի ընկնել: Թիմի համար լավ է, բայց կարծում եմ՝ Հենրիխը պետք է էգոիստ լինի և ավելի շատ հարվածներ կատարի», – ասաց նա:
Վիդիչը կարծում է, որ Մխիթարյանը պետք է մրցաշրջանի ընթացքում 10-15 գոլի ձգտի:
«Պրեմիեր լիգայի երկու խաղերում Մխիթարյանն արդեն չորս գոլային փոխանցում է կատարել, այն դեպքում, երբ ամբողջ անցած խաղաշրջանի ընթացքում միայն մեկն էր կատարել», – ավելացրեց նա։
Մի քանի օր առաջ Հայաստանի հավաքականի ֆուտբոլիստի մասին նման գովասանքի խոսքեր էր ասել նաև «ՄՅ» լեգենդ Ռայան Գիգզը։
«Յունայթեդն ավելի հզոր է Մատիչի, Լուկակուի հետ, սակայն իրապես աչք է շոյում խաղացողների ստեղծագործ միտքը։ Հենրիխ Մխիթարյանն արդեն չորս գոլային փոխանցում է կատարել։ Հուսով եմ, որ նա կկարողանա վերադառնալ այն ձևին, որում խաղում էր «Դորտմունդի» կազմում», – ասել էր նա։