ԵՐԵՎԱՆ, 27 օգոստոսի — Sputnik. Ադրբեջանի պաշտպանության նախարարությունն ու ԱԻՆ-ը հաստատել են, որ զինապահեստներից մեկում պայթյուն է որոտացել: Այս մասին հայտնում է ՌԻԱ Նովոստին:
«Կիրակի Ադրբեջանի պաշտպանության նախարարության N զորամասի զինապահեստում հրդեհ է բռնկել, որի հետևանքով տարածքում պայթյուններ են գրանցվել»,- հայտնել են Ադրբեջանի ՊՆ-ից:
Նշվում է, որ դեպքի պատճառները պարզելու և անվտանգության համապատասխան միջոցներ ձեռնարկելու նպատակով զորամասում աշխատում է համապատասխան կառույցների ներկայացուցիչներից կազմված խումբը:
«Այս պահին զոհերի ու տուժածների մասին տեղեկություն չկա»,- հայտնել են գերատեսչությունից:
Ադրբեջանի ԱԻՆ-ն էլ հայտնել է, որ դեպքի վայր է մեկնել մի քանի հրշեջ հաշվարկ:
