ԵՐԵՎԱՆ, 28 օգոստոսի — Sputnik. ՀՀ գյուղատնտեսության նախարարության Սննդամթերքի անվտանգության պետական ծառայությունը չի պաշտպանում սպառողների իրավունքները, երկուշաբթի լրագրողներին ասաց Հանրային խորհրդին կից գործող Սննդամթերքի անվտանգության պետական ծառայության անդամ Դոնարա Ալեքսանյանը։
Նրա խոսքով` տասը տարի է` համագործակցում է պետական ծառայության հետ, բայց վերջին ժամանակաշրջանում ծառայությունը գրեթե դադարել է աշխատել։ Ալեքսանյանը պնդում է, որ մի քանի անգամ ստուգման է ուղարկել կաթնամթերք, մսամթերք և այլն, իսկ կառույցի աշխատակիցները, նրա խոսքով, հայտարարել են, որ առանց վարչապետի թույլտվության` արտադրանքը ստուգելու իրավունք չունեն։
«Բացի այդ, Ծառայությունում ասում են, որ որոշ արտադրություններ պատկանում են այս կամ այն բարձրաստիճան պաշտոնյանների ծանոթներին, բարեկամներին, ընկերներին, և իրենք ոչինչ անել չեն կարող», – ասաց Ալեքսանյանը։
Ծառայության վատ աշխատանքի վառ ապացույցը, ըստ նրա, «Երևան Սիթի» սուպերմարկետում փչացած կոնֆետների գնման դեպքն էր։ Ալեքսանյանը պատմեց, որ Սանկտ Պետերբուրգի արտադրության «Օբոժայկա» կոնֆետներ է գնել, որոնք տհաճ համ են ունեցել։ Ավելի ուշ նա համացանցում պարզել է, որ պիտակի վրա նշված արտադրող ընկերությունն իրականում նման արտադրանք չունի։
Նա դիմել է Սննդամթերքի անվտանգության պետական ծառայությանն ու «Ստանդարտ–Դիալոգ» լաբորատորիային։ Լաբորատորիայից տրամադրել են ստուգման արդյունքները, որոնց համաձայն` կոնֆետների մեջ բորբոս է հայտնաբերվել։ Պետական ծառայությունում, նրա պնդմամբ, առանց ստորագրության և կնիքի թուղթ են տրամադրել, որի վրա գրված է` կոնֆետները «նորմալ» վիճակում են։
Միայն գյուղատնտեսության նախարարի հետ հանդիպելուց հետո (Պետծառայության ղեկավար Իշխան Կարապետյանի ներկայությամբ) նրան նոր եզրակացություն են տրամադրել։
Այդ փաստաթղթի համաձայն` նրանք «Երևան Սիթիի» երեք սուպերմարկետներում հավաքել են ընդհանուր քաշով 21.5 կգ կոնֆետ։ Ալեքսանյանը նաև վտանգավոր սննդամթերքի ոչնչացման (այդ նույն 21.5 կգ կոնֆետի) վերաբերյալ ակտ է ստացել (ժամկետանց լինելու պատճառով)։
«Նրանց խոսքով` կոնֆետները ոչնչացրել են, երբ ժամկետը լրացել է, այսինքն օգոստոսի 3-ին, սակայն ես նրանց ավելի շուտ էի դիմել», – ասաց Ալեքսանյանը։
Նա նշեց, որ Սննդամթերքի անվտանգության պետական ծառայությանը կից գործող Հանրային խորհուրդը չի աշխատում և չի էլ պատրաստվում աշխատել, քանի որ այդ կառույցում աշխատող մարդիկ ամենևին էլ շահագրգռված չեն պաշտպանել սպառողների իրավունքները։
Պետական ծառայությունից Sputnik Արմենիային հայտնեցին, որ Ալեքսանյանի դիմելուց հետո անհրաժեշտ բոլոր միջոցառումներն իրականացվել են ժամանակին, վաճառողների փաստաթղթերի ստուգման ժամանակ որևէ խախտում չի հայտնաբերվել։
«Առաջին անգամ որևէ պատճառ չի եղել ստուգման նպատակով նմուշ վերցնելու համար։ Երկրորդ անգամ, երբ Ալեքսանյանը հարցը բարձրացրեց, մենք առգրավեցինք այդ ապրանքը, և քանի որ ժամկետն արդեն անցել էր, այն ոչնչացվեց», – ասաց Սննդամթերքի անվտանգության պետական ծառայության սննդամթերքի անվտանգության և որակի հսկողության տեսչության պետ Վահե Դանիելյանը։
Նա զարմացավ Դոնարա Ալեքսանյանի հայտարարություններից` նշելով, որ պետական ծառայությունը առաջարկել է նրա անմիջական ներկայությամբ իրականացնել ստուգումները, բայց Ալեքսանյանը հրաժարվել է։
