ԵՐԵՎԱՆ, 28 օգոստոսի — Sputnik. Հիվանդանոցում մահացել է Կրասնոդարի երկրամասում բանվորներ տեղափոխող ավտոբուսի վթարի հետևանքով վիրավորներից մեկը, այսպիսով՝ զոհերի թիվը հասել է 19-ի: Այդ մասին հայտնում ՌԻԱ Նովոստին՝ վկայակոչելով երկրամասի արտակարգ ծառայություններում ունեցած աղբյուրին:
«Ավտոբուսի ընկնելու հետևանքով զոհվել է 19 մարդ, վիրավորներից մեկը մահացել է բուժհաստատությունում։ Հիվանդանոցում է մնում 19 մարդ»,- ասել է գործակալության զրուցակիցը:
Նշվում է, որ ՌԴ Կրասնոդարի երկրամասում տեղի ունեցած վթարի պատճառն ավտոբուսի արգելակների անսարքությունն է եղել:
Ինչպես հայտնել է Ռուսաստանի քննչական կոմիտեն, դատարանը կալանավորել է շրջված ավտոբուսի վարորդ Կարապետ Միքայելյանին, ինչպես նաև անհատ ձեռներեց Յուրի Վեչերաձեին:
Հարուցվել է քրեական գործ՝ «Տրանսպորտային միջոցների շահագործման կանոնների խախտման» և «Անվտանգության պահանջներին չհամապատասխանող ծառայությունների տրամադրման» մասին հոդվածներով:
Հիշեցնենք, որ պատահարը տեղի էր ունեցել օգոստոսի 25-ին՝ տեղի ժամանակով ժամը 8:20-ին, Կրասնոդարի երկրամասի Տեմրյուկի շրջանում: Ավտոբուսում եղել են «Таманьнефтегаз» ընկերության բանվորները: Ավտոբուսը, որում եղել է 50 մարդ, կամրջի վրայից ընկել է ջուրը:
