ԵՐԵՎԱՆ, 30 օգոստոսի — Sputnik. Թուրքիայի նախագահ Ռեջեփ Թայիփ Էրդողանի 15 թիկնապահներին ԱՄՆ-ում մեղադրանք է առաջադրվել Վաշինգտոնում խաղաղ ցուցարարների վրա հարձակման համար։ Այս մասին հայտնում է Hurriyet Daily News–ը։
Գործադրած բռնության համար մեղադրյալներին սպառնում է առավելագույնը 15 տարվա ազատազրկում։
Նրանցից մի քանիսը լրացուցիչ մեղադրվում է մահաբեր զենքով հարձակման համար:
Հիշեցնենք, որ մայիսի 16-ին Միացյալ Նահանգներում Թուրքիայի դեսպանի նստավայրի մոտակայքում Էրդողանի` ԱՄՆ կատարած այցի դեմ բողոքող խաղաղ ցուցարարների խմբի վրա հարձակվել էին էրդողանամետ խմբերը։
Ցույցը կազմակերպել էին մի շարք կազմակերպություններ, որոնց թվում էր եղել նաև Ամերիկայի Հայ դատի հանձնախումբը: Ցույցին մասնակցել են մի շարք այլ խմբեր, որոնց թվում են եղել հայկական, հունական, քրդական և ասորական համայնքների ներկայացուցիչներ:
ԱՄՆ Ներկայացուցիչների պալատն ավելի վաղ Էրդողանի թիկնազորի գործողությունները դատապարտող բանաձև էր ընդունել։
