ԵՐԵՎԱՆ, 30 օգոստոսի — Sputnik. ՀՀ ԱԻՆ «Հիդրոմետ» ծառայության օդերևութաբանության կենտրոնի պետ Գագիկ Սուրենյանը մեկնաբանել է հաղորդագրությունն այն մասին, որ «Նաիրիտի ծուխը կտեղաշարժվի Թուրքիա»։
«Ի պատասխան բազմաթիվ մասնավոր հարցումների` հայտնում եմ, որ ԱԻՆ Հիդրոմետ ծառայությունը չի կանխատեսել և պաշտոնապես հայտարարել, թե Նաիրիտի ծուխը կտեղաշարժվի Թուրքիա: Օդերևութաբանական կանխատեսումները տեղադրվում են ԱԻՆ կայքում և իմ ֆեյսբուքյան էջում։ Իսկ եթե որևէ մեկը փորձել է մեր կանխատեսումները ''թարգմանել'' կամ այդ կերպ մեկնաբանել, ապա Հիդրոմետ ծառայությունը դրա հետ կապ չունի»,- գրել է Սուրենյանը։
Ավելի վաղ տեղեկություն էր տարածվել, որ Գագիկ Սուրենյանն ու ՀՀ առողջապահության նախարարությունը հայտարարել են, որ «Նաիրիտ» գործարանի ծուծը տեղաշարժվում է Թուրքիա։
Առողջապահության նախարարությունը օգոստոսի 28-ին հաղորդագրություն էր տարածել` նշելով «ՀՀ ԱԻՆ Հիդրոմետ ծառայության օդերևութաբանության կենտրոնի տվյալներով ժամը 17-ից հետո սպասվում է քամի հյուսիս-արևելքից դեպի հարավ-արևմուտք»։
Հ.Գ. Նշանակում է, որ քամին շարժվում է Թուրքիայի սահմանի ուղղությամբ։
