ԵՐԵՎԱՆ, 1 սեպտեմբերի – Sputnik. Մալարիայով հիվանդը Դիլիջանի UWC Dilijan միջազգային դպրոցի ուսանողուհի է, որը վերջերս է Հայաստան եկել Հարավային Սուդանից։ ԱՆ գլխավոր վարակաբան, «Նորք» ինֆեկցիոն կլինիկական հիվանդանոցի ղեկավար Արա Ասոյանը Sputnik Արմենիայի հետ զրույցում հաղորդեց, որ սուդանցի աղջկա վիճակը կայունացել է։
«Հարավային Սուդանի համար բնորոշ է այդ հիվանդությունը` տրոպիկական մալարիան, կարծեմ` այնտեղից արդեն վարակված եկել է այստեղ, որովհետև հոսպիտալցվելուց 3 օր առաջ էր եկել Հայաստան։ Բավականին ծանր վիճակում է տեղափոխվել հիվանդանոց` բարձր ջերմություն, գիտակցությունը մթագնած»,–ասաց Ասոյանը։
Գլխավոր վարակաբանի հաղորդած տեղեկություններով` անմիջապես անցել են բուժման։ Դեղորայք միշտ ունենում են 1–2 հիվանդի համար, որովհետև Հայաստանում նման դեպքեր հաճախ չեն պատահում։
Այսօր հիվանդի հոսպիտալացման 5–րդ օրն է։ Հաշվի առնելով, որ նա լիարժեք ապաքինված չէ, դեռ կմնա հիվանդանոցում։ Այս պահին հայտնի չէ, թե երբ դուրս կգրեն։
Մալարիան մեկ մարդուց մյուսին չի փոխանցվում։ Այդ հարուցիչը մարդու օրգանիզմում հայտնվում է Anopheles տեսակի էգ մոծակների խայթոցի հետևանքով։ Առողջապահության համաշխարհային կազմակերպության տվյալները փաստում են, որ ամեն տարի աշխարհում մալարիայով վարակվելու 124-283 մլն դեպք է գրանցվում, նրանցից 367-755 հազարը մահանում են։