ԵՐԵՎԱՆ, 4 սեպտեմբերի — Sputnik. ԱՄՆ-ում ռուսական դիվանագիտական ներկայացուցչությունները Սան Ֆրանցիսկոյում գլխավոր հյուպատոսությունը փակվելուց հետո կաշխատեն նախկին ծավալով: Այդ մասին հայտարարել է ՌԴ դեսպանատան մամուլի քարտուղար Նիկոլայ Լախոնինը, փոխանցում է ՌԻԱ Նովոստին:
«Ամերիկյան իշխանությունների ոչ բարեկամական գործողությունների ենթատեքստում, որոնք հանգեցրել են ԱՄՆ-ում ռուսական խոշորագույն գլխավոր հյուպատոսության փակմանը, ցանկանում ենք ուշադրությունը հրավիրել այն հանգամանքի վրա, որ ռուսական մնացյալ հյուպատոսական հաստատությունները մտադիր չեն նվազեցնելու հյուպատոսական ծառայությունների մատուցման ամբողջ համալիրի աշխատանքների ինտենսիվությունը»,- նշված է մամուլի քարտուղարի հայտարարության մեջ:
ՌԴ դեսպանատան Facebook-ի էջում նշված է, որ Սան Ֆրանցիսկոյում ՌԴ գլխավոր հյուպատոսության փակման հետ կապված մինչեւ նոր տեղեկատվությունը ԱՄՆ տարածքում հյուպատոսական ծառայությունների համար անհրաժեշտ է դիմել ցանկացած հարմար ռուսական հյուպատոսական հաստատություն՝ Վաշինգտոնում, Նյու Յորքում, Սիեթլում կամ Հյուսթոնում:
«Սան Ֆրանցիսկոյում գլխավոր հյուպատոսությանը նախկինում ներկայացված բոլոր փաստաթղթերը փոխանցվել են Սիեթլում գլխավոր հյուպատոսությանը»,- նշված է հաղորդագրության մեջ:
