ԵՐԵՎԱՆ, 4 սեպտեմբերի — Sputnik. Գրաբարի դպրոցական շտեմարանը նշանակալի ազդեցություն կունենա դպրոցներում գրաբարի ուսուցման և տարածման գործընթացի վրա, կօգնի ուսուցիչներին մեթոդական կողմնորոշման հարցում, վստահեցնում են շտեմերանի հեղինակները։
Արարատյան Հայրապետական թեմի «Գրաբարյան օրեր» ծրագրի շրջանակում տպագրված շտեմարանի շնորհանդեսը կայացել է այսօր Արարատյան Հայրապետական թեմի առաջնորդարանում։ Այս մասին հայտնում է Երևանի քաղաքապետարանը։
Միջոցառմանը ներկա են գտնվել Երևանի քաղաքապետ Տարոն Մարգարյանը, ՀՀ կրթության և գիտության նախարար Լևոն Մկրտչյանը, Արարատյան Հայրապետական թեմի առաջնորդական փոխանորդ Գերաշնորհ Տ. Նավասարդ արքեպիսկոպոս Կճոյանը և «Փյունիկ» բարեգործական հիմնադրամի նախագահ Լևոն Սարգսյանը:
Արարատյան Հայրապետական թեմի «Գրաբարյան օրեր» ծրագիրն իրականացվում է 2014թ.-ից՝ Երևանի քաղաքապետարանի, ՀՀ կրթության և գիտության նախարարության, ինչպես նաև «Փյունիկ» բարեգործական հիմնադրամի աջակցությամբ:
Ծրագրի նպատակն է խթանել գրաբարի նկատմամբ հետաքրքրությունը՝ աշակերտների շրջանում խրախուսելով գրաբարի ուսուցումը:
