ԵՐԵՎԱՆ, 4 սեպտեմբերի — Sputnik. Հայաստանի հավաքականի այսօրվա ցուցադրած արդյունքները Հայաստանի հավաքականի ու «Մանչեսթեր Յունայթեդի» կիսապաշտպան Հենրիխ Մխիթարյանի վաստակն է։ Այս մասին Sputnik Արմենիայի հետ զրույցում ասաց Հայաստանի հավաքականի նախկին ավագ Երվանդ Սուքիասյանը։
Նրա խոսքով` երբ Հենրիխը դաշտ է դուրս գալիս, թիմն ուժեղանում է։
«Հենրիխը հայկական ֆուտբոլի համար շատ բան է արել։ Նա մեծ ապագա ունի։ Ես նրա հետ մեծ հույսեր եմ կապում։ Համոզված եմ`նա դեռ ցույց կտա իրեն։ Հենրիխը մեզ սովորեցրել է, որ նա լավագույնն է, մենք նրանից միշտ գոլային փոխանցումներ ու գոլեր ենք ակնկալում։ Ես խաղացել եմ նրա հոր` Համլետ Մխիթարյանի հետ։ Շատ կուզենայի, որ Մխիթարյան կրտսերն օրինակ ծառայեր երիտասարդ հայ ֆուտբոլիստների համար», — նշեց Sputnik Արմենիայի զրուցակիցը։
Սակայն, Սուքիասյանի կարծիքով, չի կարելի համեմատել Հենրիխի ու Համլետի խաղը. նրանք տարբեր ֆուտբոլիստներ են։ Ընդ որում` հայրը շատ աշխույժ ու շարժուն էր, իսկ Հենրիխը` հակառակը` հանգիստ ու զուսպ։
Աշխատանքը գեղեցկացնում է մարդուն
Աշխատասիրությունը օգնել է Հենրիխին մեծ բարձունքներ նվաճել, նշեց Հայաստանի հավաքականի նախկին ֆուտբոլիստը։
«Ասեմ ավելին` երբ «Մանչեսթեր Յունայթեդի» խաղացողներին հանգստյան օր են տալիս, Հենրիխը չի հանգստանում, նա մարզվում է, կատարելագործվում։ Փառք հայոց ֆուտբոլին, որ մեզ Հենրիխ Մխիթարյանի նման հիանալի մարդ նվիրեց։ Իհարկե, նրա դաստիարակության հարցում մեծ է ընտանիքի դերը», — կարծում է Սուքիասյանը։
Հարցին, թե ինչ է պետք Մխիթարյանին, որպեսզի սեփական հավաքականի կազմում խաղը նույնպես տեսարժան լինի, Սուքիասյանը հարցով պատասխանեց.
«Իսկ Հենրիխը երբևիցե վատ խաղացե՞լ է Հայաստանի հավաքականի կազմում։ Եթե ուզում եք մասնագիտական կարծիք լսել, ասեմ հետևյալը` թիմի այլ անդամների համեմատ Հենրիխն ամենաշատն է վազում», — նշեց նա։
Նրա խոսքով` չի կարելի ֆուտբոլիստին գնահատել մեկ խաղով կամ այն հանգամանքով, որ նա գոլ չի խփել կամ գոլային փոխանցում չի արել։
«Սա սխալ մոտեցում է… Տեսեք` ինչ տղաներ են խաղում Հենրիխի կողքին «Մանչեսթեր Յունայթեդում»։ Չի կարելի այդ թիմը համեմատել Հայաստանի հավաքականի հետ։ Հասկանալի է` երբ թիմում այդպիսի պրոֆեսիոնալներ են, դա պարտադրող է», — նշեց Սուքիասյանը։
Միկին լավագույնն է
Հայաստանի ֆուտբոլի ազգային հավաքականի գլխավոր մարզիչ Արթուր Պետրոսյանը, Հենրիխի մասին խոսելիս, նույնպես շեշտում է ֆուտբոլիստի ջանասիրությունը։
Նրա խոսքով` հայկական թիմի խաղը Հենրիխի հետ մի բան է, առանց Հենրիխի` լրիվ այլ։
«Մխիթարյանի ներկայությունը ոգևորում է թիմակիցներին։ Տաղանդավոր ֆուտբոլիստը նրանց համար օրինակ է ծառայում», — Sputnik Արմենիայի հետ զրույցում ասաց Պետրոսյանը։
Ի դեպ, Մխիթարյանը միակ հայ ֆուտբոլիստն է, որը երկրպագուների մեծ բանակ ունի ամբողջ աշխարհում։ Բացի այդ` «Մանչեսթեր Յունայթեդի» երկրպագուները փոխել են բրիտանացի երաժիշտ Սթինգի «Englishman In New York» երգի բառերը ու նվիրել հայ ֆուտբոլիստին։ Դրա կրկներգը հնչում է այսպես.« Whoa Mkhitaryan, Henrikh Mkhitaryan, he's our midfield Armenian» (Մխիթարյան, Հենրիխ Մխիթարյան, նա մեր հայ կիսապաշտպանն է)։
