Իրանի պաշտպանության նախարար Ամիր Հաթամին հայտարարել է, որ անհրաժեշտության դեպքում Իրանը զենք կմատակարարի հարևան պետություններին։ Իրանը ցանկություն ունի զարգացնել երկրի հրթիռային ծրագիրը։
Իրանագետ Վարդան Ոսկանյանի կարծիքով` խոսքը հատկապես վերաբերում է Մերձավոր Արևելքի պետություններին։
«Ակնհայտ է, որ Իրանն ունի ռազմարդյունաբերական զարգացած համալիր։ Բնականաբար, շահագրգռված է իր հետ սերտ հարաբերություն ունեցող պետություններին զենք մատակարարելու հարցում։ Խոսքն առաջին հերթին վերաբերում է Սիրիային, Լիբանանին և այլն»,-ասաց նա։
Ինչ վերաբերում է այս հայտարարության ֆոնին հայկական հետաքրքրվածությանը, ապա, իրանագետի խոսքով, Հայաստանն իր սպառազինության հիմնական հատվածը շատ ավելի էժան գներով ապահովում է Ռուսաստանի հետ գործակցության շրջանակում։
«Միաժամանակ չի կարելի բացառել, որ Հայաստանն ու Իրանը կարող են այս հարցում գործակցել։ Շատ ավելի ընդունելի կլիներ, եթե որոշակի ոլորտներում ստեղծվեին հայ-իրանական համատեղ ձեռնարկություններ։ Խոսքը հատկապես վերաբերում է անօդաչու թռչող սարքերի դեմ պայքարի տեխնոլոգիաներին»,- ասաց Ոսկանյանը։
