ԵՐԵՎԱՆ, 4 սեպտեմբերի — Sputnik. Որևէ արտառոց բան չկա՝ Հայաստանը մասնակցում է, թե ոչ ՆԱՏՕ-ի զորավարժություններին, երկուշաբթի հայտարարեց ՀՀ պաշտպանության նախարարի տեղակալ Արտակ Զաքարյանը։
«Արտառոց բան չկա: Դա չի նշանակում, որ մեր գործընկերությունը նվազում է կամ ավելանում մեկ այլ օղակի հաշվին»,-ասաց նա «Հակառակորդի ռազմաքաղաքական մարտավարությունն ու մեր գործողությունները» համաժողովի ժամանակ։
Նրա խոսքով` այդ որոշումը չի անդրադառնում ՆԱՏՕ-ի հետ ունեցած գործընկերության վրա։
«Մենք ՀԱՊԿ անդամ ենք, և դա առանցքային նշանակություն ունի։ Արտակարգ իրավիճակներում, աղետների դեպքում, նաև զինված ուժերի շրջանակներում ունենք լայն համագործակցություն և գործընկերություն ՆԱՏՕ-ի հետ, այստեղ մի բանի մասնակցել կամ չմասնակցելը որպես արտառոց միջոցառում պետք չէ դիտարկել»,- ասաց նա։
Ավելի վաղ Վրաստանի ՊՆ-ն հայտարարել էր, որ հայ զինծառայողները չեն ժամանել մասնակցելու Agile Spirit 2017 բազմազգ զորավարժություններին, որոնք նախօրեին մեկնարկել են «Օրպոլո» զորավարժարանում։
Agile Spirit-ին, բացի ՆԱՏՕ-ի անդամ երկրներից, մասնակցում են նաև Վրաստանի և ՆԱՏՕ գործընկեր երկրները՝ Ուկրաինան և Ադրբեջանը:
Զորավարժությունները երկու փուլ են նախատեսում` շտաբային և դաշտային: Agile Spirit զորավարժություններն անցկացվում են Վրաստանում սկսած 2011 թվականից ամեն տարի` Վրաստան-ՆԱՏՕ համագործակցության շրջանակներում: Նպատակն է` կատարելագործել փոխգործակցությունը կանոնավոր գործողություններում և ծանոթանալ տարբեր երկրների ռազմական մարտավարություններին: 2015 թվականին այդ զորավարժություններին հայկական կողմը մասնակցել է դիտորդի կարգավիճակով:
